Elizalde eta Altzibarren merkataritza txikia sustatzeko diru laguntza martxan
35.000 eurokoa da diru laguntza, eta sortu berri diren edo azken bost urteetan abiatu diren proiektuei bideratua dago.
Hiru helburu nagusi ditu Oiartzungo Udalak abiatu berri duen diru laguntza lerroak: “herriko merkataritza-sarea sendotzea, herritarrei eguneroko beharrak auzoetan bertan asetzeko aukera ematea, eta lokal hutsetan proiektu berriak bultzatuz auzoak biziberritzea”. Berriak diren edo azken bost urteetan sortu diren proiektuei bideratua dago, “kontuan hartuta hasierako urteak izaten direla zailenak”. Herriko proiektu txikiei esker “komunitatea bizia eta kohesionatua” mantentzen da, Aiako Harria Gaztelumendi alkateordearen arabera.
Era guztietako negozioak hauspotu nahi dituzte Elizalde-Altzibar ardatzean: “arropa edota janari dendak, hortz-klinikak, okindegiak, abokatu eta gestoria bulegoak, fisioterapia zentroak, informatika zerbitzuak, estetika zentroak…”. Bost irizpideren arabera banatuko dituzte laguntzak, betiere gehienez bost urteko antzinatasuna badute: negozio bat sortu, kaletik zuzeneko sarbiderik ez duen lokal batetik sarbidea duen lokal batera aldatu, herriko azalera handiko guneetatik Elizalde edo Altzibarrera lekualdatu, edo ixtera doan negozio baten jarraipenerako eskualdaketa kasuan, hain zuzen ere.
Guztira 35.000 bideratuko ditu Udalak laguntzetara. Negozio bakoitzarentzat ezberdina izan daiteke diru-laguntza, irekiera urtearen arabera. Lehen urtean 4.000, bigarren eta hirugarrenean 3.500, laugarrenean 2.500, eta azkenik, bosgarren urtean 1.500 euro arte iritsi daitezke.
Urte osoan zehar egin daiteke eskera, eta Udaletxean bertan eta webgunetik egin daiteke.
