Barruti batzarrak, herritarrengana gerturatzeko
Herritarren parte hartzea sustatu eta komunikazio zuzena indartzeko, udalak Barruti batzarrak egingo ditu maiatzetik ekainera, lau barrutietan.
Laura Ré, Teo Alberro eta Maitane Barrenetxea, Barruti batzarren aurkezpenean. Pasaiako Udalak apustu sendoa egin du herritarren parte hartzea sustatu eta komunikazio zuzena indartzeko helburuarekin. 2023an eratutako udal gobernuak “konpromiso argia” hartu zuen herritarrengandik hurbilago eta gertuago egongo den erakunde bat eraikitzeko. Konpromiso horri helduta, udalak Barruti batzarrak izeneko egitasmoa abiatuko du lehen aldiz, eta gaur aurkeztu dituzte iniziatiba berriaren ildo nagusiak Teo Alberro alkateak, Laura Ré Parte hartze zinegotziak eta Maitane Barrenetxea Parte hartze teknikariak.
Barruti batzarrak maiatzetik ekainera bitartean izango dira, eta batzar bana egingo da barruti bakoitzean. Bilkura horietan Pasaiako alkatea, Parte hartze zinegotzia eta barruti bakoitzeko alkateordea izango dira, eta ordu eta erdi inguruko iraupena izango dute. Batzarrek helburu bikoitza izango dutela adierazi dute gaur udal ordezkariek, bi norabide izango baitituzte. Alde batetik, udal gobernuak “bertatik bertara” aurkeztuko dizkie herritarrei martxan dauden proiektuak eta politika publikoak. Bestalde, udal ordezkariek herritarren beharrak, kezkak eta proposamenak jasoko dituzte.
Honakoa adierazi du Alberrok Barruti batzarren aurkezpenean: “Pasaia parte hartzaileago bati buruz hitz egitea ez da zaila, baina apustuak sendoa eta erreala behar du izan hitz hutsaletan ez dadin gera. Gure gobernuak konbikzio osoa du herritarrekin batera eraiki behar dela udal kudeaketa. Hori da gure apustua: entzutea, elkarrekin erabakitzea eta gardentasunez jardutea”.
Alkateak jakinarazi du “ezinbestekoa” izan dela eta izango dela parte hartze politikak gauzatzeko baliabideak sustatzea. Hori dela eta, egungo udal gobernuak etenda zeuden Alkateordetza zerbitzuak berreskuratu zituen eta parte hartze eta komunikazio teknikarien postuak sortu zituen, “informazio fluxu zuzena eta aberatsa” jaso dezaten pasaitarrek.
Laura Ré Parte hartzaile zinegotziak Barruti batzarren inguruko xehetasunak eman ditu: “Barruti batzarrak izango dira aurrerantzean, herritarren eta udalaren arteko harreman zuzena egonkortzeko tresna nagusienetako bat. Orain arte hainbat parte hartze prozesu egin ditugu: Aparkalekuaren Ordenantzaren idazketarako, Gure Zumardia diseinatzeko, San Pedroko kioskoaren etorkizunari buruzko erabakia hartzeko… Orain, ordea, egitura orokor eta iraunkorra sortzea da asmoa, halako prozesu espezifikoekin aurrera jarraituko badugu ere”.
Azkenik, Maitane Barrenetxea Parte hartze teknikariak batzarren egituraren eta edukien inguruko informazioa argitu du: “Esan bezala, alde biko interakzioa izango dute helburu batzarrek. Guztietan bloke orokor bat izango da, Pasaiari eta pasaitar guztiei eragiten dieten gai orokor edo zeharkakoen berri emateko. Eta, ondoren, espezifikoki eragiten dizkioten gaiak mahai gaineratuko dira batzarretan”. Esaterako, topoko obra edo Luzuriaga Antxon; saneamendua eta itsasgorak Donibanen; Nabarra Bouako garaje publikoak eta arrantza San Pedron; edota Azkuene Goiako baratzen proiektua eta Ziriza Trintxerpen.
Martxan dauden proiektuak eta politikak azalduta, herritarrek kezka, behar, proposamen edo iradokizunak helarazteko aukera izango dutela baietsi du alkateak: “Horren bidez, aurrez aurreko harremanak indartu eta gure bizilagunen berri modu zuzenean jasoko dugu”. Udal ordezkariek dei egin diete herritarrei batzarretara hurbildu eta parte har dezaten.
Barruti batzarren egitaraua
- Hilaren 26an Trintxerpeko Alkateordetzan, 19:30ean.
- Hilaren 28an Antxoko Kultur Etxean, 18:30ean.
- Ekainaren 3an Donibaneko Juanba Berasategin, 18:30ean.
- Ekainaren 5ean San Pedroko Udal Aretoan, 18:30ean.
