Mugak gainditzeko eguna, erronka eta festa bidez
Aski ezaguna da Arkaitz 'Kalu' Erize bere 'erokeria' sortagatik. Hurrengoa Aspanogi elkartearen alde egingo du, hilaren 24an: Baiona eta Lezo batuko ditu, Mugak Gaindituz erronkarekin.
Markelen Irria, Juneren Hegoak, eta Aspanogiko kideak, Arkaitz 'Kalu' Erizerekin batera Mugak Gaindituz aurkezten.Mugak Gaindituz Asebetetzen duten gauzak egin nahi ditu Arkaitz Kalu Erize lezoarrak. Ez bere burua edo egoa aireratzen dituztenak; jendartearen asebetetzea du bizitza xede, behar dutenei laguntzea, sufrimenduan direnei babesa ematea, haurrei batez ere. Horregatik da ezagun eskualdean Erize, Markel Merino haurraren aldeko hainbat elkartasun erronka erraldoi egin dituelako. «Baina minbizia duten haurren errealitatea ezagutzea tokatu zait. Baita haien alde ari den Aspanogi elkartea ere. Zerbait egitea pentsatu nuen». Laburra izan zen pentsamenduen eta erabakien arteko tartea: hilaren 24rako prestatu du zerbait hori. Mugak Gaindituz izena du.
Gipuzkoako Haur Minbizidunen Familien Elkartea da Aspanogi. Alta, aurreko elkartasun erronketan onuradun izan diren Markelen Irriak eta Juneren Hegoak laguntzaile izango ditu hilaren 24ko erronkan: 05:00etatik 17:00etara, Baiona eta Lezo arteko bidea egingo du lasterkariak, mendiz, errepidez eta itsasoz (Donibane eta San Pedro arteko zatia igerian egingo du). «Aspanogik sekulako lana egiten du. Ikusgarri egin behar da haien zeregina, ezagutzen ez dena ez baita existitzen».
Lapurdiko hiriburuaren eta Unibertsitatearen arteko hamabi orduko bidean laguntzaileak izango ditu Erizek. Tartean izango dira Trintxerpeko Trikaia Kirol Elkarteko kideak, Hijos de Ruta motorzaleen elkarguneko kideak, eta hala nahi duten guztiak. Lezoko Udala babesleen artean da. «Nahiko nuke, beti bezala, bidea bitartean ondoan beti laguntzaileak izatea. Agian ni naiz honen guztiaren buru, bai. Baina pertsonaletik haragoko erronka da egiten dudan bakoitza. Norbait bide osoa edo zati bat nirekin egiteko prest bada, ongietorria», ziurtatu du lezoarrak.
Arratsaldean, festa Lezon
Baionan 05:00etan abiatuko du Mugak Gaindituz Erizek. Handik Hendaiara arteko bidea egin, eta Gipuzkoan Irundik sartuko da, Hondarribia zeharkatu, eta Jaizkibeldik Donibaneraino iristeko. Igerian San Pedrora joan, eta han izango ditu zain Hijos de Rutako motorzaleak; haiekin joango da Lezoraino Trintxerpe, Antxo eta Errenteria-Orereta pasa ondoren. 17:00etan da iristekoa herrira.
Aurretik jada herrian giroa izanen da, 16:00etan haurrentzako lasterketak egingo direlako. 17:30ean hasiko da Aspanogiren aldeko festa: haurrentzako jarduerak, erraldoiak, zumba saioa (18:30), txaranga, elkartasun zozketetako sarien ematea (21:00) eta DJa izango dira Gurutze Santuaren plazan.
