Oiartzunek MUGI sistema baliatzen jarraituko du
Oiartzungo Udalak eta Gipuzkoako Garraioaren Lurralde Aginteritzak Udalak azken honen barruan jarraitzeko hitzarmena izenpetu dute. Oraingoz hurrengo lau urteetarako luzatu dute.
Agustin Lekuona Oiartzungo alkateorde eta Azahara Dominguez Gipuzkoako Garraioaren Lurralde Aginteritzako presidenteak Oiartzunek GGLAn jarraitzeko hitzarmena luzatu dute, oraingoz behintzat, hurrengo lau urteetarako. Hitzarmenari esker, Oiartzunen MUGI sistema erabiltzen jarraitzen ahalko da.
2012an sinatu zen tarifak integratzeko sistema ezartzeko lankidetza protokoloa, eta hala, “udalen eta garraio operadoreen arteko hitzarmen sare bat sortu zen, Gipuzkoako mugikortasun sistema publikoa hobetzeko ahaleginak koordinatzeko”. Lankidetza protokolo honen baitan sartzen da gaur luzatutako hitzarmena.
Hainbat abantaila ditu MUGI sistemaren barnean egoteak: “erabiltzaileei txartel bakarra, zonakatze komuna, garraioa gehien erabiltzen dutenentzako deskontu progresiboak, beren kolektiboaren araberako hobariak eta doako ontzi aldaketak, besteak beste”. Gipuzkoa “Estatu osoan aitzindaria eta erreferentea” dela azpimarratu du Dominguezek.
Oiartzungo Udalarentzat ere garrantzitsua da “herritar guztientzako garraio publiko eraginkor, irisgarri eta kalitatezko bat bermatzea” Lekuona alkateordearen hitzetan. Norabide horretan, proiektu ugari abiatu dituzte, eta MUGI sisteman jarraitzeko hautua “ezinbestekoa da herritarrek garraio publikoa geroz eta gehiago erabiltzeko”.
