Historiaurrea ezagutzeko saioak eman ditu Raoul Servertek
Geomorfologo eta paleontropologoak Elizalde Herri Eskolako LH6. mailako ikasleei eman dizkie Paleolitoa, Neolitoa eta Metal aroa ezagutzeko eskolak.
Elizalde Herri Eskolako LH6. mailako ikasleek Historiaurrea “gertutik” ezagutzeko aukera izan dute Raoul Servert geomorfologo eta paleontropologoak gidatutako saio batzuen bidez; zehazki, eskola horietan, Paleolitoa, Neolitoa eta Metal Aroa ezagutzeko aukera izan dute. Hamabigarren urtez egin dute elkarlana Elizaldek eta Servert-ek, bigarrenak “ibilbide luzea” baitu mundu horretan.
Ikastaro horien helburuetako bat da Homo Sapiensa nondik datorren ikastea, eta, horretarako, Servert-ek, teoria eta praktika alderdiak uztartu ditu.
Hizlaria mundu mailan egiten ari diren aurkikuntzen berri eman ari da, eta horretarako, ikerkuntzetan aurkitutako arrasto horien erreprodukzioak eraman ditu ikastetxera. Eskala errealean egindako tximino antropomorfo handien busto eta kaskezurrak dira aipagarrienak: giboiena, gorilena, orangutanena, txinpantzeena…
Era berean, hominidoak ere landu dituzte; hala nola, Australopitekoak, Parantropoak, Homo habilisa, Homo erektusa eta Neandertala.
Saio hauekin lortu dute antolatzaileek helburuetako bat: ikasleek ulertzea zergatik ari diren oraindik Historiarrearen liburua idazten. “Zerbait bizia da. Aurkikuntza batek zalantzan jar dezake teoria jakin bat. Gure espeziea, munduaren zilborra ez dela ulertzeko adina ikasi dute”.
