"Proposamena eta finantzaketa ez dira Jaurlaritzarekin negoziatu eta sail honek ez ditu bere gain hartzen"
'Bide berria', topoaren integraziorako proposamen integrala aurkeztu du udalak. Azalpen oharra helarazi du Eusko Jaurlaritzak atzo arratsaldean bertan esanez ez dutela bere gain hartuko proposamen hori, ez delako haiekin negoziatu.
Erdialdea-Gaztañoko trenbide pasabidea.Izaro Perez Loperena Ez dela eurekin negoziatu ez proposamena ezta finantziazioa ere eta horrenbestez, Mugikortasun Jasangarriaren sailak esan du ez duela udalak topoa integratzeko aurkeztutako proposamena bere gain hartzen. Bide berria proposamena aurkeztu zuen atzo Errenteriako Udalak, EH Bilduk, Elkarrekin errenteria, EAJ eta PPk babestuta. Bertan topoaren ibilbidearen integraziorako proposamena egin zuen Galtzaraborda, Erdialdea-Gaztaño eta Fanderiako zatietarako.
Atzo arratsaldean bertan azalpen oharra helarazi zuen Eusko Jaurlaritzaren Mugikortasun Jasangarriaren sailak.
Lau puntu aipatu ditu ohar horretan. Lehenik eta behin, astelehenean Errenteriako Udalarekin sinatutako protokoloa aipatu du, “Errenterian trenaren integrazioa hobetzeko konpromiso komuna ezartzen du, Galtzaraborda estaliz, geltoki hori zahar berrituz, eta Gaztañoko trenbide pasagunea kenduz”.
Astelehenean sinatutako protokolo horrek berak, trena erdialdean eta Fanderian hobeto integratzeko aukera aztertzea ere jaso du, “aldeek adostuta”. Ez duela, ordea, ezartzen bi administrazioen artean aztertu ez diren udal titularitateko ideien edo proiektuen zenbateko ekonomikorik nabarmen jarri du Eusko Jaurlaritzaren sailak, eta Bide Berria proposamena eta finantzaketa ez direla Eusko Jaurlaritzarekin negoziatu, “beraz sail honek ez ditu bere gain hartzen”.
Azalpen oharrean beste puntu bati ere egin dio erreferentzia Mugikortasun Jasangarriaren sailak, eta zehaztu du “topoaren bidaiarien eskaria handitzea” ez dakarren eta trenbide inguruko udal-ingurunea hobetzeko edozein hirigintza jarduerari ekonomikoki tokiko administrazioak eta Eusko Jaurlaritzak egin beharko diotela aurre, “erdi bana”.
Bukatzeko, prestutasuna azaldu du “Errenterian bizi diren pertsonen bizi kalitatea hobetzeko” eta horrekin lotuta, bere eskumenekoak diren proiektuak aktibatu dituela dagoeneko adierazi du, “Galtzaraborda estaltzea eta Gaztañoko—Erdialdea-Gaztaño— trenbide pasagunea kentzea, ETS Euskal Trenbide Sarearen bidez. Administrazioen artean hartutako akordioen berri zorroztasunez emateko eskatzen dugu, bukatzeko”.
