Elkarretaratzera deitu du Errenteria Osasunak larunbaterako
Agerraldia egin du gaur Errenteria Osasuna plataformak orain arte egindakoaren bilana egiteko. Papresa eta inguruko bizilagunen arteko "elkarbizitza duina" duela helburu gogorarazi du.
Agerraldia egin dute gaur goizean. Elkarretaratzera deitu du Errenteria Osasuna plataformak larunbatean, hilak 14, Papresako zubian, eta bat egitera deitu ditu herritar guztiak. 12:00etan izango da. Plataforma horrek Papresa eta inguruko bizilagunen arteko elkarbizitza duina lortzea duela helburu gogorarazi du gaur egin duen agerraldian, “auzotarren bizi kalitatea bermatzeko”.
Deialdia zabaltzearekin batera orain arte egindako lanaren balantzea ere egin du Errenteria Osasunak. Hala, gogora ekarri du aspaldi hasi zirela neurriak eskatzen Papresaren jarduerak bizilagunei eragiten dizkien kalteak saihesteko, “zarata gogaikarriak, usain txarrak eta trafiko astuna. Horiek ezabatzeko neurriak eskatu arren enpresak beste baimen bat izapidetu zuen 2023an, instalazio berriak barne, eta ondorioz administrazioarekin lotutako lan serio bati ekin genion”.
Alegazioak aurkeztuta, ez zuten aurrera egin eta gora jotzeko errekurtsoa aurkeztu zuten ordiuan auzo elkarteek eta Eguzkik, baina hori ere ezetsi egin zuen Eusko Jaurlaritzak.
Iazko irailean berriz, plataformak salaketa aurkeztu zuen Gipuzkoako Probintzia Fiskaltzan, Eusko Jaurlaritzak aurkeztutako alegazioak eta errekurtsoak zorroztasunez ez izapidetu izana leporatuta. Aurtengo martxoan, salaketa hori Donostiako 5. zenbakiko instrukzioko epaitegira bidaltzea agindu zuen, gertakariek baliabide naturalen eta ingurumenaren aurkako delitu baten ezaugarriak dituztelako, aurretiazko eginbideak has ditzan.
Epailea egiten ari den eginbideen norainokoa ez dakitela azaldu dute gaur Papresa aurrean bildutako kaltetuek, “baina oraingoz ez da egoera aldatu, nahiz eta salaketak legez ezarritako zarata mailak gainditu direla egiaztatzen duten txostenak egon arren”. Azken txostena iazko martxokoa da.
Zarate eta usainen eraginpean etengabe egoteak hainbat patologiarekin lotuta dagoela ere jarri dute mahai gainean gaurko agerraldian, “zientifikoki probatuta dago estresa, insomnioa, nekea, depresioa, antsietatea, eta hipertentsioa eragiten dituela besteak beste. Hori da pairatzen dugun errealitate gordina”.
Errenteria Osasunak lanean jarraitzeko konpromisoa adierazi du, “Eusko Jaurlaritzari isurien eta beste parametro batzuen mugak ezartzeko eskatu diogu, merezi dugun Papresarekiko bizikidetza duina bermatzeko; herritarrak eta ingurumena errespetatzen dituen herri bat lortzeko”.
Ondoko bideoa Imanol Saiz Gomez de Segurak egina da.
