Pasaia KM0 antzerki jaialdia, hilaren 20tik 22ra
Arte eszeniko herrikoiaren jaialdiak talde ez profesionalei ikusgarritasuna ematea du helburu. Aurtengoa hirugarren ekitaldia da, eta sei emanaldirekin lurreratuko da Donibanen.
Hilaren 20tik 22ra bitartean Pasaia KM0 arte eszeniko herrikoiaren jaialdia egingo da Donibanen. Antzerki jaialdi hori 2023an sortu zen, Pasaiako eta inguruko herrietako talde ez profesionalen sorkuntza eszenikoei ikusgarritasuna emateko asmoarekin. Aurtengoa antzerkia ardatz duen jaialdiaren hirugarren ekitaldia izango da, eta sei emanaldi izango ditu. Antolatzaileek adierazi dute herritarren arteko topaketa bat dela, “egunerokoan, herriko plazetan, tabernetan, azoka eta dendetan elkar ikusten duten herritarrak topatzeko modu berezia”. Musikaren, dantzaren eta antzerkiaren bitartez, “pentsamendu kritikoa, sortzailea eta ikuslego aktibo eta demandante bat” sustatzeko helburua du Pasaia KM0 jaialdiak.
“Udal gobernutik antzerki amateurren aldeko apustu irmoa egiten dugu. KM0 erreferente bat bilakatu da dagoeneko, eta lanean jarraituko dugu ikusgarritasun handiagoa lor dezan”, adierazi du Aitor Brion Pasaiako Udaleko Kultura eta Ondare zinegotziak. Horrez gain, honakoa esan du Iñigo Ortega zikloaren koordinatzaileak eta Pasaia Badia antzerki eskolako arduradunak: “Antzerkiarekiko pasioa ez ezik, Pasaian dagoen talentua ere islatzen duen ziklo baten aurrean gaude. Aurkezten diren lanen kalitatea ukaezina da, eta horrek harro sentiarazten gaitu”.
Aurtengo Pasaia KM0 sei emanaldirekin lurreratuko da Donibanen. Egitarauak ia genero guztiak jorratzen dituela baietsi du Brionek, musikala barne: “Izan ere, hainbat belaunaldiren oroimen kolektiboaren parte den Mocedades talde bilbotar historikoari keinu berezia egingo zaio”.
Lanak herritik sortuak eta herriari zuzenduak izango direla baietsi du Ortegak. Auzokide asko igoko dira oholtzara, eta beren artearen bidez publikoa hunkituko dutela nabarmendu du jaialdiaren koordinatzaileak.
Iazko ekitaldian bezala, emanaldi guztien bukaeran solasalditxo bat egingo dutela aurreratu dute antolatzaileek, ikusleen eta antzezleen arteko hartu emana elikatzeko. Emanaldi guztietako sarrerak doakoak badira ere, Juanba Berasategin egingo direnek gonbidapenak behar dituztela jakinarazi dute jaialdiaren sustatzaileek, edukiera mugatua baita. Sarrera horiek Bibe plataformaren bidez hartu behar dira.
Pasaia KM0 jaialdiaren egitaraua
Hilak 20, ostirala
- 19:00: Orratx! konpainiaren Bidaia Galduak emanaldia, Juanba Berasategin.
Hilak 21, larunbata
- 17:00: Anakrusa konpainiaren Kalma emanaldia, Santiago plazan.
- 19:00: Trebera konpainiaren Recordando Mocedades ikuskizuna, Juanba Berasategin.
Hilak 22, igandea
- 19:00: Askotariko antzerki emanaldiak, hiru antzerki motz bata bestearen jarraian, Juanba Berasategin. Aleka konpainiaren Emakume bat, bakarrik, Ander Lacalleren ¿Fumas?, eta Baga taldearen Bernarda klownen etxea.
