Dantzazaleek erromeria giroa bermatuko dute
Egun osoko egitarauarekin bihar egingo da Lezoko Euskal Jaia. Sagardo Festa, herri kirolak, eta dantza dira egunaren euskarri nagusienak. Lezoko Dantzazaleen emaria nabarmena izango da.
Lezoko Dantzazaleak, lehengo asteko mendekosteetan egin zuten dantzaldian.Lezoko Dantzazaleak Mendekosteetatik indarberritzeko tartea laburra izan da. Bihar (larunbata) festa giroa nagusituko da berriz ere Lezon: hemen da Euskal Jaia. Herriko eragileek eta udalak mamiz bete dute eguna, jada klasikoak diren jarduerekin: Tiñeluren Sagardo Festa, herri kirolak, Tomas Garbizu Musika Eskolako nahiz Munttarreko txistularien emanaldiak, eta dantza. Dantza asko. Garai bateko erromeria giroa ezarriko dute beste behin Lezoko Dantzazaleek goizean hasi eta arratsera arte. Euskal Jaiaren ildo nagusia haiek izango dira, ekitaldi bat bestearekin konektatuko dute. Ondoko orrialdeko zerrendan aurki daitezke biharko jarduerak.
Bihar egingo dituztenak iragartzeko kartelean haiekin bat egin nahi dutenei hiru eskaera egin dizkiete Dantzazaleek: baserritar jantziarekin jaistea, dantzatzeko gogoa izatea, eta heldua izatea. «Dantzari gazteek eta haurrek euren presentzia bermatua dute; plazako dantzak ere egiten dira mutxikoei esker. Baina gure asmoa da garai bateko erromerietan izaten zen giro hori herrian txertatzea. Lezon garai batean erromeria oso esanguratsuak egiten ziren-eta. Horri eusten ari gara azken urteetan, eta lortzen ari gara», esan du Gurutze Alberdi Lezoko Dantzazaleak taldeko kideak: «Helduak gara. Hori da gure taldearen izaera». Haiekin bat egiteko helduek ateak zabalik dituztela adierazi du Alberdik.
Bihar ez dira bakarrik izango. Izan ere, III. Dantzari Festa da bihar egunean zehar herriak jasoko duena, eta Alberdik aurreratu du Lezoko eta inguruko herrietako dantzariez gainera, Arabatik, Bizkaitik, Nafarroatik eta Ipar Euskal Herritik etorritakoak ere izango direla. «Goizean taldetan banatuko gara eta herriko plazetan erromeria dantzak egingo ditugu, herri osora irits dadin dantza giroa. Ondoren, denek elkarrekin eta Gurutze Santuaren plazan Agintariena eta Agurra dantzatuko ditugu», zehaztu du. Baztango mutil dantzak egiteko hango Bertze Hainbeste taldekoak ere izango dira Lezon, «azken urteetan emakumeak ere dira bertako taldekide».
Goizeko saioen ondoren herri bazkaria egingo dute Lezo Herri Eskolako jolastokian. 130 lagunek emana dute izena. «Pixkanaka gorantz doa partaideen kopurua, jendea animatzen ari da. Egun oso polita da guretzat, arratsaldean Sagardo Jaiarekin ere bat egiten dugulako», azaldu du Alberdik. Han, txotxa hasteko mahai gaineko emanaldia egingo dute, eta sagardoaren festa bukatze aldera, Larrain dantza.
Sagardo Festa
Egunaren beste indarguneetakoa Tiñeluren Sagardo Festa izango da. 18:00etatik aurrera hasiko dira herriko hamabi baserritako uzta banatzen; eguraldia eskasa balitz, Karlos Saldise plazak hartuko luke txotxa. Tiñelutik adierazi dute 40 boluntario ariko direla lanean, beraz, auzolan ariketa handia egin behar izan dute beste behin elkartekideek dena egoki gara dadin. Aurtengoa Sagardo Festaren XXV. ekitaldia izango da.
Sagardoaren jaiaren aurretik (17:00), ordea, harri proba desafioa du Lezok, Astigarragaren kontra: baietz herriko taldeak irabazi.
Lezoko Euskal Jaia. Egitaraua.
• 09:30. Diana Munttar Lezoko Txistulari Taldearekin.
• 11:00. Euskal Dantzazaleen erromeria dantzak honako plazetan: Gurutze Santuarena, Goiko Plaza, Karlos Saldise eta Lopene.
• 11:30. Tomas Garbizu Musika Eskolako trikitixa taldekoen kalebuelta.
• 12:00. Ipar Euskal herriko herri kirolak Gurutze Santuaren plazan.
• 14:00. Dantza taldeen topaketa Gurutze Santuaren plazan.
• 14:30. Herri bazkaria Lezo Herri Eskolako jolastokian.
• 17:00. Lezo-Astigarraga harri proba desafioa probalekuan.
• 18:00. Sagardo Festaren hasiera Gurutze Santuaren plazan.
• 19:30. Larrain dantza plazan.
