Jende andana elkartu du sagardoak Lezon
XXV. Sagardo Festa egin dute gaur, Lezon, eta aurtengo omendua Lezokoak merkatari, ostalari eta zerbitzuen elkartea izan da.
Euskal Jaia ari dira ospatzen gaur Lezon egun osoko egitarauarekin, baina apurka apurka ari dira egunaren amaierara heltzen. Diana, Euskal Dantzazaleen erromeria (jarraian dagoen irudien galerian haien argazkiak daude), Tomas Garbizu Musika Eskolako trikiti taldekoen kalebuelta, herri kirolak, dantza zaleen topaketa, herri bazkaria eta Lezo-Astigarraga harri proba desafioa egin dituzte dagoeneko; baina, jende andana elkartu duen ekitaldiaren zain ziren asko: XXV. Sagardo Festa.
Arratsaldeko seietan hasi da jendea hurbiltzen sagardo postuetara, eta gero eta jende gehiago bertaratu da sagardo ezberdinak dastatzeko gogoz. Sagardo dastaketari hasiera eman aurretik, herriko hamabi sagardoak aurkeztu dituzte, banan bana. Honakoak dira sagardoan, aurkezpenean aipatutako ordena jarraiki: Maldaburu, Itzu Txiki, Oiartzabal Txiki, Epertxoko, Larramun, Saizar, Sagarzulo, Eguzkitza, Olaziregi, Abendaño, Bordatxo eta Torreatze.
Herriko hamabi baserritan ekoitzitako sagardoak aipatuta, aurtengo omendua zein den aitortu dute: Lezokoak merkatari, ostalari eta zerbitzu elkartea.
Gaurko egunerako Dantzazaleek, besteak beste, baserritar jantziarekin jaisteko eskaera egin zieten herritarrei, eta batzuk bete dute esandakoa. Ordu eta erdiz sagardo artean lasai egoteko aukera izango dute herritarrek, arik eta iluntzeko zazpi eta erdiak aldera Larrain dantza plazan hasten den arte.
HITZA Sagardo Jaian izan da, eta zenbait irudi bildu ditu.
