Brontzezko txapa lepotik zintzilik itzuli dira etxera Hibaikako emakumeak
Espainiako txapelketan hirugarren izan dira errenteriarrak.
Hibaikako Emakume Seniorrak atzo Castro Urdialesen, hirugarren sailkatu eta gero.Iñaki Nogueira 'Goral' Bikain ari dira Hibaikako Senior Emakumeak, eta beste garaipen batekin itzuli dira etxera. Atzo jokatu zen Espainiako traineru txapelketan brontzea lortu zuten, hirugarren postua eginda, Iñaki Mendizabalek gidatzen dituen emakumeek. Haien aurretik Arraun Lagunak (10:35.25) eta Tolosaldea (10:40.93). Hibaikak 10:53.99 denbora egin zuen; Astillerok (11:03.49); eta Zarautzek (11:05.58).
Castro Urdialesen (Kantabria, Espainia) jokatu dute txapelketa.
Emaitzarekin oso pozik azaldu da Mendizabal, errenteriarren entrenatzailea. Espainiako Txapelketan lortutako emaitzari ez ezik, aurretik jokatutako Gipuzkoako Txapelketa, Lekeitioko estropada, eta Euskadiko Txapelketari ere egin die erreferentzia Mendizabalek, “horien ostean gogotsu ginen Espainiako Txapelketa jokatzeko, gehien bat beste arerio bat genuelako bertan, Astillero, eta beraien kontra lehiatu nahi genuen”.
Neurria ongi hartu diote errenteriarrek, Astilleroren aurretik sailkatu baita Hibaika, tarte polita aterata.
Sinistuta dago, azken estropada eta txapelketetan lortutako emaitzek indar handia emango dietela liga hasi bitartean. Uztailaren 5ean hasiko da Euskotren Liga.
Zaleentzat mezua ere bidali du Mendizabalek, arraunlariek babesa oso garrantzitsua dutela jakitun, “bultzatu eta jarraitu estropadak ea denboraldi biribila izaten dugun”.
Euskadiko Txapelketan “txapa” irabazteko borrokatzera aterako zirela esan zuen Hibaikako patroi Inge Ugarte Gartziandiak; brontzezkoa zintzilikatu zuten orduan, eta asteburu honetakoan ere, hala egin dute, brontzea etxera ekarrita.
Hibaikaren ontzian aritu ziren arraunlariak
- Itxaso Murcia Susenene
- Amaiur Garcia Rincon
- June Galardi Zapirain
- Nerea Orena Diaz
- Maddi Insausti Intziarte
- Eva Lopez Chafer
- Ane Aiestaran etxebeste
- June Mikeo Antequera
- Amaiur Olaiz Ibarzabal
- Nerea Deobarro Corvo
- Elene Telletxea Yarzabal
- Sofia Boscarol Orive
- Nora Urbe Muxika
- Inge Ugarte Gartziandia (Patroia)
