Zubiak Eraikiz hitzarmenak zutabe berriak ditu
Zubiak Eraikiz hitzarmena berritu dute Lapurdi, Gipuzkoa eta Nafarroako zortzi ikastolek—2016an baino hiru gehiagok— Ipar Euskal Herriko ikastolei sustengua ematen jarraitzeko.
Zubiak Eraikiz hitzarmena berritu zuten eguneko irudia.Orereta Ikastola Zutabe sendoz jaio zen Zubiak Eraikiz hitzarmena 2016an. Urruña, Biriatu, Hendaia, Ziburu eta Orereta Ikastolek abiatu zuten sustengurako eta administrazioez gaindiko nazio ikuspegia lantzea helburu zuen proiektua. Pasa den astean berritu dute hitzarmen hori eta une honetan zortzi ikastola barnebiltzen ditu bere baitan: Hendaiako gure Ikastola, Ziburuko Kaskarotenea eta Pairres Lartzabal Kolegioa, Biriatuko Ikastola, Berako Labiaga ikastola, Lesakako Tantirumairuk, Elizondoko Baztan Ikastola eta Orereta-Oiartzo ikastolak.
Hiru administraziotan banatuta izanda ere ikastolena “proiektu nazionala” dela jarri zuten nabarmen hitzarmena berritzeko Hendaian egindako ekitaldian: “Ikastolen, ikasleen zein familien, eta irakasleen arteko harremanak sortu eta indartu, batzuen zein besteen errealitatea ezagutzea, nazio ikuspegia lantzea euskara izanik denentzako hizkuntza komuna eta beharrik handiena duten Ipar Euskal Herriko Ikastolei sustengua eskaintzea du xede Zubiak Eraikiz hitzarmenak”.
Eguneroko jardunetik administrazio eremurik gabeko Euskal Herria eraikitzeko ikastolen proiektua dela ere azaldu zuten ekitaldi horretan.
Hitzarmenaren parte diren ikastoletako ikasle zein ordezkariez gain, Seaskako lehendakaritzako Sophie Layus, Nafarroako Ikastolen Elkarteko lehendakari Oier San Jurjo, eta Ikastolen elkarteko lehendakari Nekane Artola.
Mugaz gaindiko Euroeskualdea erakundearen diru laguntza izan du proiektuak azken bi ikasturteetan berritze eta indartze prozesuan.
Hitzarmenaren berrespenarekin batera, proiektua pausatu, egonkortu nahi dutela zehaztu dute “iraunkortu”. Elkartasuna saretzea eta berrikuntza pedagogikoa partekatzea ere badituzte jomugan Zubiak Eraikiz proiektuaren bidez. Azkenik hedapena bultzatu nahi dute: “proiektu bizia da Zubiak Eraikiz eta errekastoetako ur emariak lotuz Bidasoa eta Ebro hurbiltzea du helburu, bai baitira muga administratiboz gaindiko harremanak dituzten beste ikastola asko, haiek ere beren bidea egiten”.
Zubiak Eraikiz hitzarmenaren gaineko informazio guztia hemen klik eginda irakur daiteke.
