2024 "urte emankorra" izan da Oarsoaldearentzat
Oarsoaldea Garapen Agentziak 2024 urtearen balantzea egin du Oarsolan Inklusio eta Berrikuntzarako zentro berrian.
Oarsoaldea Garapen Agentziak 2024. urtearen balantzea egin du Oarsolan Inklusio eta Berrikuntzarako zentro berrian egindako ekitaldi batean.
Inklusioaren eta enpleguaren arloan, 1.679 pertsonei eman die arreta, eta 359 partaide izan dituzte enplegu programetan. Era berean, intserzio indizea %69,4koa izan da, eta jakinarazi dutenez 42.224 pertsona langaberi eman diete laguntza; orotara, 6.433 lan eskaintza kudeatu dituzte. Gainera, inklusioari dagokionean, azaldu dute zenbait proiektu berritzaile jarri dituztela abian; hala nola Baserriberri, W proiektua eta Etxekolan.
Iraunkortasun eta berrikuntzari dagokionean, ekonomia eta lurralde garapeneko estrategia arloan, 144 enpresa eta eragilek hartu dute parte programetan, eta 121 ekintzaile berriri eman zaie arreta. Hots, 157 kontsulta erantzun dituzte, eta azpimarratu dute 2017-2024 urteetan 6.244 enpresari eta 2.045 ekintzaile eman diotela laguntza.
Bestalde, Oarsoaldeko bisitei dagokienean 35.207 kontsulta eta 15.107 bisitari izan dituzte; turismo sektoreko enpresetatik 255 kontsulta izan dituzte denera.
Jasangarritasunari so, nabarmendu dute Birgaitze Bulegoaren bidez Next Bulegoan ebatzitako diru laguntza kopurua 3.641.007,96 eurokoa izan dela. Gainera, azpimarratu dute efizientzia energetikoan kontuan hartzen duten Birgaitze obretan, egoera zaurgarrian dauden 495 diru laguntza eskaera kudeatu dituztela, eta Energia Bulegoan, berriz, 246 hitzordu. Haatik, tokiko enpresei Biratu proiektuarekin lagundu diete garapen agentziakoek.
Agenda2030arekin jarraituz, gehitu dute euskararen ahozko eta idatzizko erabilera sustatzen jarraitu dutela zenbait ekimenen bidez, eta, egitasmo horietan, merkatarien eta ostalarien %58ak hartu dute partu egitasmoan.
Halaber, 1.223 ikasle aritu dira euskaltegietan euskara ikasten, eta 307 gaztek hartu dute parte euskara arloko egitasmoetan.
Azkenik, kontsumo bulegoan 1.506 eskaera kudeatu dituztela nabarmendu dute, baita 195 erreklamazio izapidetu eta 134 erreklamazio konpondu ere.
Gauzak horrela, 2024an egiteko zehaztu zituzten helburu guztien betetze maila %79,34koa izan da.
