"LGTBIK+ kolektibo eta pertsona askoren borroka ordainezina aitortu nahi dugu"
LGTBI+ Kolektiboaren Nazioarteko Egunaren harira adierazpen instituzionala egin du Errenteriako Udalak.
Ortzadar bandera udaletxeko balkoian artxiboko irudi batean. Ekainaren 28a, LGTBI+ Kolektiboaren Nazioarteko Eguna dela eta, adierazpen instituzionala egin du Errenteriako Udalak. Bertan, kolektiboek eta ekintzaileek urteetan egindako borroka “neketsuaren” ondoren lortutako eskubideak “hauskorrak” direla azaldu du, “oso erraza da horiek galdu eta atzera egitea”.
Horren atzean, eskuin muturreko diskurtsoen gorakada jarri du eta nabarmen jarri errealitate kezkagarri bat mahai gaineratu, “eraso LGTBIK+fobikoen datuak gero eta handiagoak dira, armairuak bizitzaren arlo guztietan jarraitzen du, diskurtso patologizatzaileak ugaritzen dira eta, ondorioz, LGTBIK+ pertsonen bizitzak arriskuan daude”.
Hori horrela, ezinbestekoa jo du erakundeek politika publiko “integralak eta sendoak” ezartzea, baita ikuspegi feministan oinarritutako zerbitzuak eta babes kolektiboko eta autodefentsazko mekanismoak garatzea, “politika anekdotikoak alde batera uzteko garaia da, egiturazkoak diren politiketan zentratzeko; Errenterian hori egiten ari gara, eta hori sustatzen jarraituko dugu”.
Adireazpen instituzionala hitzez hitz irakurri eta hartutako konpromisoak irakurtzeko, klik hemen.
