San Pedrok eta Antxok indarrak neurtuko dituzte
Trapaia Gazte Taldeak antolatuta, San Pedrok eta Antxok herri kirolen desafioa egingo dute bihar frontoian, 17:00etatik aurrera.
Iaz irekitako bideari jarraituta, sanpedrotarrek herri kirolen desafioa egingo dute aurtengo festetan, Trapaia Gazte Taldeak antolatuta. Iaz, Donibaneren aurka neurtu zituzten indarrak moreek, baina aurten arrosak taldea osatzeko gai izan ez direnez, antxotarren kontra arituko direla aurreratu du Haizea Ibargarai Trapaiako kideak. Maiatzaren 24an, Antxoko Basari Elkartearen egunean, sanpedrotarrak Antxon izan ziren lehian, eta bihar (larunbata) itzulerako desafioa egingo dute bi barrutiek San Pedroko frontoian, 17:00etatik aurrera eta Kitadelpare txarangak girotuta.
Talde bakoitzak zortzi partaide izango ditu, launa gizon eta emakumez osatutakoak. Desafioan herri kirol probak eta jolasak egingo dituztela jakinarazi du Ibargaraik, eta, esaterako, honakoetan murgilduko dira sanpedrotarrak eta antxotarrak: lokotxak, trontza, soka tira, barrena, txingak edota kutxa lasterketa.
Trapaiako kideak argi du mota honetako probak antolatzearen helburua dela herrian giroa sortzea, jendearen parte hartzea bultzatzea eta beste herri eta barrutiekin harremanak egitea. Izan ere, desafioaren ondoren, afari herrikoia izango da San Pedron, eta antxotarrak afaltzera gonbidatu dituzte.
Iazko desafioan, Donibaneren kontra jokatutakoan, jendeak «oso-oso ondo» pasa zuela baietsi du Ibargaraik, eta proba horiek San Pedrora ekartzea ideia ona iruditu zitzaien, jendeari gustatzen baitzaizkio. Herritarrek bihar izango dute herri kirolez eta barrutien arteko lehiaz gozatzeko aukera.
