Madalenetan, 130 ekintzatik gora
Zumardiko oholtza nagusitik pasako dira aurtengo madalenetan, Puro Relajo, Niña Coyote eta Chico Tornado, Oihan Vega, J. Martina eta Errenteriako Musika Banda.
Jai batzordearen aurkezpena.Herri Bizia Gerturatzen ari dira madalenak, eta gogotsu da jai batzordea uztailaren 21etik 25era bitartean herriko plazak eta txokoak musikaz, kolorez, dantzaz eta topaketez bete daitezen. Hilabeteak daramate lanean egitarau anitza sortzeko, eta antolatutakoak guztien gozamenerako izan daitezen nahi dute.
Ostiralean egin zuen aurkezpena jai batzordeak eta hainbat datu eman. Denera, 130 ekintzatik gora antolatu dituzte: erakusketa, antzerki, kirol jarduerak, danborradak, dantza, lehiaketa eta dastaketa gastronomikoak, besteak beste. Horietatik guztietatik, gainera, 70 izango dira musika emanaldiak, “publiko eta gustu ezberdinei zuzenduta”. Horren erakusle, Zumardiko oholtza nagusian ariko diren taldeen berri eman dute. Zumardiko oholtza nagusitik pasako dira aurtengo madalenetan, Puro Relajo, Niña Coyote eta Chico Tornado, Oihan Vega, J. Martina eta Errenteriako Musika Banda.
Aurten ere hiru txupinazo izango dira: mila koloreko txupinazo txikia, Holi txupinazoa, eta txupinazoa. Azken hori zuzenean jarraitzeko aukera izango da Herriko Plazan, edota Zumardian udalak jarriko duen pantaila erraldoiaren bidez. Bertaratu ezin dutenek, gainera, etxetik edota munduko edozein puntutik jarraitzeko aukera izango dute zuzenean emango baitute stremaning bidez Herri Bizia webgunean (egin klik hemen).
Elkarlanaren lehen topagunea baina, hilaren 21ean 14:00etan izango da, Herriko Plazan egingo duten herri bazkarian.
Madalenetako zapiak salgai direla dagoeneko jakinarazi du jai batzordeak, 6 euroan eros daitezke herriko hainbat puntutan. (Kontsultatu zerrenda albiste bukaeran).
Jaiak denen gozamenerako etaerasoez libre gozatu ahal izateko apustua egin du jai batzordeak, “hori horrela erasorik gabeko madalenak helburu dituen neurri sortarekin bat egiten dugu”.
Madalenak prestatzen gozatu duten adina gozatuko dutela festak bizitzen esan dute bukatzeko, “eta herritarrek hala egitea gustatuko litzaiguke. Ez ahaztu etxean lepoko gorri-urdina eta atera kalera gozatzera, jaiak marraztuz, haietan parte hartuz, jai herrikoiak biziz”.
