Isuria Zubitxo errekan, Labadero inguruan
Inguruko obra bateko saretatik iritsi ziren atzo, astelehena, ur zikinak Zubitxo errekara. Herritarren abisua jaso zuen udalak, eta berehalako neurriak hartu.
Isuriaren irudi bat.Lezoko Udala Lezoko Udalak jakinarazi du atzo (astelehena) isuria izan zela Zubitxo errekan, Labaderoaren inguruan. Herritar batek eman zion abisua udalari. Zehazki, isuriaren hodia euri urena zela egiaztatu zuen udalak, eta hortaz, ez lukeela inolako ur zikinik zabaldu beharko. Hala, azterketa sakonagoa egin ondoren, inguruko kale bateko eraikin batean egiten ari diren lanen ondoriozko isuria zela egiaztatu ahal izan zuen udal erakundeak. Laster batean etenarazi zen ur zikin horien emaria.
Isuriaren berri izan eta berehala hara joan ziren Lezoko Udaleko Ingurumen teknikaria eta Ur Zerbitzuen arduraduna Labadero ingurura. Haiek egindako azterketaren arabera, isuriaren jatorri izan zen lanen eremuan euri urak jasotzen dituzten bi sareta daude, eta horietatik hondakin zeramikoak eta mortero hautsa ere iragazi ziren Zubitxo errekara.
“Zorionez isuritako elementuak ez dira kutsakorrak eta ez dute kalte larririk eragin. Gainera, herritarrek azkar detektatu eta jakinarazi izanari esker, ondorio larriak ekidin ahal izan dira”, zehaztu du udalak.
