Orientazio mapak eguneratu dituzte
Errenteriako Udalak orientaziorako hainbat hiri mapa ditu; horiek berrikusi eta eguneratu egin ditu.
Errenteriako Udalak orientaziorako hainbat hiri mapa ditu, horietako lau Listorretako parkean eta hiru Errenteriako hirigunean, hainbat zailtasunetako ibilbideekin. Orientazio kirolak jarduera fisikoa eta mentala uztartzen ditu, parte hartzailearen autonomia lantzen du, eta ingurune berriak ezagutzeko aukera ematen du. Bakarrik, familiarekin, lehiaketan edo aisialdian egin daitekeen jarduera mota da, gainera. Ezagutzen ez diren herriko txokoak ezagutzen lagun dezakeen jarduera ere bada.
Duela zazpi urte jarri zuen martxan udalak iniziatiba hori, mapa berriak gehitzen joan da, eta orain ibilbide horiek guztiak berrikusi ditu.
Listorretako orientazio zirkuituek Barrengoloiako turismo etxolan dute irteera eta helmuga, luzera desberdinekin, eta banaka edo taldeka egiteko pentsatuta daude. Aukera ezin hobea da familia edo kuadrilla plan bat antolatzeko, naturaz ingurune ezin hobean gozatzeko aukera ematen baitu, eta aldi berean erronka txikiak antolatzeko ere bai, kide bakoitzaren orientazio gaitasunak frogatuz.
Zirkuiturik laburrenak 1,4 km ditu eta luzeenak 4,6. Bestalde, 2,4 eta 3,2 km bitarteko distantziak ere badaude. Erreferentzia gisa, pertsona adituenek ordu eta erdi inguru ematen dute 4,6 kilometroko ibilbide osoa egiten.
Errenteriak, Listorretako ibilbideez gain, beste hiru zirkuitu ditu herri barruan, hasiberriak mapekin ohitu daitezen. 2 km-ko luzera duen zirkuitu horietako bat, seguruenik txikienekin egiteko errazena, Fanderian dago eta irteera igerilekuen parean dauka.
Beste zirkuitu bat Galtzarabordako Udal Kiroldegitik abiatzen da, eta 2,4 km luze da. Alaberga, Galtzaraborda eta Beraun auzoetan barrena. Hirugarren zirkuituko irteera, 2,7 km-koa, zentroko Turismo Bulegoaren parean dago eta Agustinak eta Gaztaño auzoak zeharkatzen ditu.
Ekimen hori Errenteriako Udalak onartutako Jarduera Fisikoaren eta Kirolaren Plan Integralaren emaitzetako bat da. Plan horren helburu estrategikoetako bat da hirigintzaren esparruan oro har aplikatzeko irizpide gisa erremintak eskuratzea, bizitza aktiboa sustatzen duten eta hiri osasuntsuago bat eraikitzea dakarten esku-hartzeak barne.
Udalak herritar guztiak animatu ditu diziplina hau ezagutu eta gozatzera. Ibilbideak egiteko mapak Errenteriako turismo bulegoan (943 49 45 21) jaso daitezke edo esteka honetan.
