Urrira arteko merezitako deskantsua
Ikasturteko azken mobilizazioa egin du Duintasunak gaur; Osasun Itunarekin kritiko eta pentsioen nahikotasuna bermatzeko HEL Herri Ekimen Legegilea izan ditu hizpide.
Duintasuna Elkartearen elkarretaratzea gaur. Pentsio eta bizi duinen aldeko aldarria kalera atera du Duintasunak gaur. Eguraldia ez dute lagun izan, eta manifestazioa ez dute egin ikasturteko azken mobilizazioan baina elkarretaratu egin dira baita euren aldarriei eutsi ere. HEL Herri Ekimen Legegilea eta Osasun Mahaia izan dituzte hizpide.
Lehenengoarekin kritiko azaldu dira pentsiodunak. Bigarrenarekin lotuta Lehendakariak, Imanol Pradalesek hartuko dituela Duintasunaren ordezkariak hilaren 17an jakinarazi dute: “Ziurrenik, beraz, ez da gaia Eusko Legebiltzarrean landuko urrira arte gutxienez. Bilera horretan espero dugu jasotzea informazioa jakiteko Eusko Jaurlaritzak zein bide hartuko duen”.
Osasun Itunarekin haserre azaldu dira Duintasuneko kideak gaurko elkarretaratzean: “arrakastatsu gisa saldu nahi digute, argi dagoena ordea, porrot ikaragarria izan dela da. Horren erakusle da sindikatu mugimendu osoa kanpoan gelditu izana. Hitzarmen hori Confebaskeko enpresariek, ospitale pribatuek, farmazeutikoen erakundeek egina da eta ez lehen arreta duina bermatzeko”.
Ituna “herren” jaio dela jarri dute nabarmen, eta sindikatuek eta osasun sistema publikoaren aldeko eragileak udatik bueltan biltzen asteko asmoa ere iragarri dute. Gogor salatu dute patronalak zein PSE-EE, PP eta EAJk osasun sistema publiko pribatuaren aldeko hautua egin dutela, “sindikatuek eta osasun sistema publikoaren aldeko eragileek, berriz, osasun sistemak publikoak behar dutela %100ean defendatzen dugu. Gure hautua eta gure borroka, osasun sistema publiko unibertsala eta kalitatezkoaren aldekoa izango da”. Horren harira, adi egoteko deia, irailetik aurrera osasun sistema publikoaren alde antolatuko diren protestetan parte hartzeko.
Minutu bateko isilunea ere egin dute gaurko elkarretaratzean, urtean zehar hildako Oarsoaldeko Duintasuneko kideen omenez, “eskerrak eman nahi dizkiegu utzi diguten borroka eta duintasun legatuarengatik”. Txalo artean bukatu dute isiltasun minutu hori.
Eskerrak eman dizkiete hileko lehen astelehenero protestekin bat egin duten herritar guztiei, “indartsu gaude, eta gorputzak horretarako aukera ematen digun bitartean borrokan jarraituko dugu, lanbide arteko gutxieneko soldatari lotutako gutxieneko pentsio duina eta baldintza duinak lortu arte. Hurrengo hitzordua oraintxe egingo dugu, urriaren 6an; hemen nahi zaituztegu guztiak, animo eta jarraitu borrokan”.
