Hiru herri larreren aprobetxamendua esleitu dute lehiaketa bidez
Bordondo, Eguzkiborda eta Añarrezarra baserrietako abere ustiategiek lortu dute udalaren jabetzako larreen aprobetxamenduaren esleipena.
Errenteriako Udalaren eta Behemendi Landa Garapeneko Elkartearen arteko hitzarmenaren bidez, udalaren jabetzakoak diren Kutarro, Aitzondo eta Belabaratzeko herri lurren abere ustiapena lehiaketa publikora atera zuten pasa den neguan. Kutarro eta Aitzondo Lau Haizeta parkean daude, eta, Belabaratza, aldiz, Zamalbide auzoan.
Behemendik antolatu du lehiaketa, betiere udalak ezarritako baldintzak kontuan hartuta, eta, jakinarazi dutenez, aipatutako kontratuen helburua da paisaia eta biodibertsitate kalitate handia lortzea, larre eremuak behar bezala mantentzea eta tokiko lehen sektoreari eta landa garapenari lotutako jarduera ekonomikoak sustatzea.
Larre horien aprobetxamendua esleitzerakoan kontuan hartu dituzte abeltzainak larreak kudeatzeko aurkezten duen sistema; ustiategiaren ezaugarriak eta lizitatzaileen ezaugarriak.
Behin jasotako proposamenen balorazioa egin ondoren, Errenteriako Bordondo, Eguzkiborda eta Añarrezarra baserrietako abere ustiategiak izan dira larre hauetako aprobetxamenduaren esleipena lortu dutenak ardiak, behiak eta behorrak kudeatzeko.
Kontratuen hasierako iraupena hiru urtekoa da printzipioz, baina beste bi urtez luzatzeko aukera dago.
