Pasaiako musika irakaskuntza sustatzea helburu
Pasaia Musikal Pasaiako Udal Musika Fundazio Publikoak eta Musikene Euskal Herriko Goi Mailako Musika Ikastegiak lankidetza hitzarmen bat sinatu dute, musika prestakuntza indartzeko xedearekin.
Pasaia Musikal Pasaiako Udal Musika Fundazio Publikoak eta Musikene Euskal Herriko Goi Mailako Musika Ikastegiak lankidetza hitzarmen bat sinatu dute. Akordio hori Pasaiako musika prestakuntza indartzeko urrats garrantzitsua dela adierazi dute Aitor Brion Pasaiako Udaleko Kultura zinegotziak eta Pasaia Musikaleko presidenteak, Gorka Miranda Pasaia Musikaleko zuzendariak eta Miren Iñarga Musikeneko zuzendariak.
Hitzarmenak bi erakundeen arteko lankidetza esparru egonkor bat ezartzen duela nabarmendu dute ordezkariek, musika irakaskuntzan bikaintasuna sustatzeko, prestakuntza eta dibulgazio proiektu bateratuak bultzatzeko eta Musikeneren ezagutza eta esperientzia Pasaiako kultura eta hezkuntza sarera hurbiltzeko.
Sinatutako akordioak hainbat lankidetza ildo jasotzen dituela baietsi dute, hala nola, prestakuntza jardueren multzoa diseinatzea, Musikeneren aholkularitza pedagogikoa eta artistikoa, ikasle eta irakasleen egoitzak garatzea eta Pasaian kontzertuak, topaketak eta jardunaldiak antolatzea.
Pasaia Musikalek, Juanje Neira Udal Musika eta Dantza Eskolaren bidez, musika eta dantza irakaskuntza helburu dituela adierazi dute ordezkariek, ikuspegi integratzaile, ireki eta tokiko errotzea sendotuz. Akordioa udal fundazioaren helburu estrategikoekin bat datorrela zehaztu dute: kalitatezko prestakuntza artistikorako sarbidea bermatzea, tokiko talentua sustatzea eta udalerriko bizitza kulturala dinamizatzea.
Horrez gain, udal fundazio gisa duen konpromisoan, Pasaia Musikalek helburu berberak dituzten beste erakunde batzuekin lankidetzan aritzearen aldeko apustua ere egiten duela baietsi dute, betiere aliantza horien onurak ikasleen mesederako izan daitezen, haien prestakuntza baita haien jardueraren lehentasunezko helburua.
Lankidetza akordio horrekin, bi erakundeek musikarekiko konpromisoa indartzen dutela adierazi dute, eraldaketa sozialerako, garapen pertsonalerako eta elkar aberasteko tresna gisa.
Ordezkarien esanak
Aitor Brion: “Akordio honekin beste urrats bat egin dugu Pasaian kalitatezko musika hezkuntza sendotzeko bidean. Musikeneren prestigioa duen erakunde batekin lankidetzan aritzeak aukera emango digu gure ikasle eta irakasleei garapen aukera berriak eskaintzeko eta gure ikasgelak erreferentziako eredu pedagogiko batera irekitzeko”.
Gorka Miranda: “Hitzarmen honek zuzenean lotzen gaitu musika-irakaskuntzaren goreneko mailarekin, eta gure prestakuntza-eskaintza aberasteko bide bat eskaintzen digu. Ilusio handia dugu aliantza horrek gure ikasleentzat, irakasle-taldearentzat eta Pasaiako kultura-bizitzarentzat izango duen eraginagatik”.
Miren Iñarga: “Musikenerentzat funtsezkoa da lurraldeko kultura eta hezkuntza eragileekin lankidetzan aritzea. Pasaia Musikalek lan eredugarria egiten du tokiko eremuan, eta pozik gaude gure baliabideekin, esperientziarekin eta hezkuntza ikuspegiarekin hazten lagundu ahal izateaz”.
