Sastakai Txaranga, karmenak alaitzeko prest
Emakumeen danborradak Trintxerpeko Sastakai Txaranga omenduko du gaur karmenak aurkezteko ekitaldian. Albistea poztasunez jaso dute, eta prest dira aurten ere musika doinuak barrutian zehar zabaltzeko.
Egun handia da gaur (ostirala) Trintxerpen, Karmengo Jaiek eztanda egingo baitute. Suziria piztearekin batera, trintxerpetarrak sei eguneko festa giroan murgilduko dira. Jai batzordeak, barrutiko eragileek eta herritarrek prest dituzte aurtengo ospakizunak, eta gustu eta publiko guztiak aintzat hartu dituen programazioa ondu dute karmenez gozatzeko. Jarduerak 16:00etan hasiko dira Azkueneko pistetan, haurrei begirako jolasak eta merienda antolatu baitituzte. 17:30ean, erraldoi eta buruhandiek kolorez beteko dituzte Trintxerpeko kaleak, Illunbeko txistulariek girotuta. 19:00etan haurren txupinazoa eta holly jaia jasoko ditu Gernika plazak, eta, 20:00etan, Arantxa Maneiro txupinerak suziria botako du barrutiko alkateordetzan. Bandera igo eta kanpaiak ere irauliko dira.
Suziria piztu baino lehen, Karmengo Jaiak aurkezteko ekitaldia egingo da alkateordetzan, 19:15ean. Ekitaldi horretan Arantxa Maneiro txupinera, danborradek proposatutakoak eta Sofia Crespo azalaren egilea omendu eta zapiak lepoan jarriko dizkiete. Aurten, emakumeen danborradak Trintxerpeko Sastakai Txaranga omenduko du, eta Ricardo Navas kideak aitortu du poztasunez jaso dutela omendu izatearen albistea: «Ez genuen espero errekonozimendua, baina poztasunez jaso dugu, gure lana aitortzen baitu. Emakumeen danborradarekin 25-30 urte inguru daramatzagu jotzen, eta pentsatzen dut pozik egongo direla gure lanarekin».
Hiru hamarkadako bidea
Sastakai 1993an lagun talde batek sortutako txaranga bat dela adierazi du Navasek. Hiru hamarkada baino gehiagoko ibilbidea osatu dute jada, eta Navasek txarangak emandako lehen pausoak oroitu ditu. Garai hartan txarangak jende helduz osatutakoak zirela baietsi du Sastakaiko kideak. Haiena, baina, 15 eta 19 urte bitarteko gazteek sortu zuten, helburu argi batekin: «Kaleko giroa gustatzen zitzaigun, eta beste txaranga batzuk ikusita, zerbait ezberdina eskaini nahi genuen errepertorio aldetik. Lagun talde bat ginen, eta horrela jarraitzen dugu, herrietako jaiak alaitzen. Txaranga gure arteko elkargune bat da».
Egun, 14 kidek osatzen dute Sastakai. Trintxerpe da haien etxea, bertan sortu ziren, eta Navasek aitortu du «gogo handiz» hartzen dituztela karmenak. Ohi bezala, emakumeen, gizonen, haurren, familien eta Azkueneko kideen danborradekin arituko dira Sastakaiko kideak. Horrez gain, haiek arduratuko dira larunbateko eta igandeko dianak girotzeaz. Karmenen zutabe garrantzitsu bihurtu da txaranga, eta hainbat jarduera musikaz beteko dituzte aurten ere.
Beren jarduna Trintxerpen abiatu bazuten ere, hiru hamarkadatan herriko jai eta jende mordoa ezagutu dutela baietsi du Navasek. Haien arteko giroa ere beti «oso ona» izan dela onartu du, eta txarangan aritzeak gauza asko ematen dizkiela nabarmendu du Sastakaiko kideak: «Oso giro polita ematen digu txarangak, esperientzia bikaina da kalean musika egitea, eta jendearen erreakzioak zuzenean ikustea ikaragarria da. Jaien parte sentitzen zara, eta hori ere polita da».
Duela pare bat aste-edo Sastakain lehen urteetan aritu zen kideetako bat zendu zela jakinarazi du Navasek, eta hura gogoan izan nahi dutela adierazi du musikariak.
