Udala eta Laurak Bat, bide beretik
Pasaiako Udalak eta Laurak Bat elkarteak lankidetza hitzarmen berri bat sinatu dute tokiko merkataritza indartzen jarraitzeko.
Pasaiako udalak eta Laurak Bat Pasaiako Merkataritza, Ostalaritza eta Zerbitzuen Elkarteak lankidetza hitzarmen berri bat sinatu dute. Udaletxeko oso bilkuren aretoa sinatu dute akordioa Teo Alberro alkateak eta Mari Carmen Mogilnicki Laurak Bateko presidenteak. Haiekin batera izan dira Mikel Garcia Merkataritzaren eta Ostalaritzaren arloko zinegotzi arduraduna eta Raquel Dominguez Laurak Bateko idazkaria.
Sinatutako akordioaren helburua da merkataritza sektorearen eta udalaren arteko harremanak indartzea, eta lankidetza esparru egoki bat ezartzea jarduera ildo estrategikoak planifikatu eta garatzeko eta Pasaiako merkataritzaren jarduera ekonomikoa bultzatzeko programak ezartzeko.
“Hitzarmen hau funtsezko tresna da gure hurbileko merkataritza indartzeko; enplegua sortzeaz gain, gure herria bizirik mantentzen baitu. Pasaia bizi baten aldeko apustua egiten dugu: dendak irekita, jarduera kaleetan, tokiko bizimodua; eta, hori lortzeko, funtsezkoa da Laurak Batekin elkarlanean aritzea”, esan du Alberrok.
Alkatearen ildotik, honakoa adierazi du Mogilnickik: “Laurak Batek esker on zintzoena adierazi nahi dio udalari lankidetza hitzarmen hau sinatzeagatik. Akordio horrek baterako ekarpen ekonomiko handia egiten du, eta urrats erabakigarria da gure udalerriko merkataritza, ostalaritza eta zerbitzuak suspertzeko”.
“Hiriko merkataritza errentagarri eta kalitatezkoaren lehiakortasuna eta eskaintza handitu nahi ditugu, merkataritza jardueraren baldintzak, establezimenduen kudeaketa, sustapena eta langileen kualifikazioa hobetzea ahalbidetzen duten neurrien bidez”, nabarmendu du Garciak.
Merkataritza sustatzeko ekintza berriak
Udalak eta Laurak batek hainbat ekintza berri abiatu dituzte herriko merkataritza sustatzeko xedearekin:
- Bonu kanpainak: Datozen hilabeteetan hainbat kanpaina eta ekintza jarriko dira abian. Alde batetik, bonu kanpainak egiten jarraituko dute urteko hainbat garaitan; azken kanpaina ekainean egin zen. Neurri horren bidez, erosleentzako deskontu bonuak dituzten erosketak sustatu nahi dira.
- Gabonetako argi berriak: Pasaiako saltokien ingurunea eta ikusgarritasuna hobetzea da akordioaren beste ildoetako bat. Gabonak garai berezia eta oso garrantzitsua dira saltokientzat, egun horietan egiten diren opariei begira izaten den salmenta bolumen handiagatik. Beharrezkotzat jo dute Pasaiako lau barrutietako kaleen eta etorbideen Gabonetako argiztapena berritzea.
- Komunikazioa sustatzea: Antxon eta Trintxerpen bi informazio pantailek izan duten harrera ona ikusita, beste bi jarriko dira Donibanen eta San Pedron.
- Bazkide gehiago: Laurak Batek konpromisoa hartu du bazkideei dagokienez hazten jarraitzeko (gaur egun 100 inguru dira) eta kultur, jolas eta jai egitasmoetan parte hartzeko, azken urteetan egin duen bezala.
Bukatzeko, honakoa adierazi du Mogilnickik Laurak Bat elkartearen izenean: “Gero eta zailagoa den testuinguru batean, merkataritza zentro handien lehia handiak eta banka digitalaren eta internet bidezko salmentaren hazkundeak markatutako garai batean, laguntza mota hauek funtsezkoak dira tokiko negozioen jarraipena eta garapena bermatzeko. Udalaren laguntzarik gabe, gero eta zailagoa izango litzateke gure saltokiei eustea. Merkataritza txikia, hurbileko ostalaritza eta tokiko zerbitzuak, enplegu eta aberastasun orokorraz gain, gure auzoen arimaren parte dira, eta hurbiltasuna, dinamismoa eta gizarte kohesioa ematen dituzte. Funtsezko sektorea gara Pasaiaren orainaldi eta etorkizunerako, eta hitzarmen honek hala izaten jarraitzeko dugun gaitasuna indartzen du”.
