Hiru oiartzuar lehiatuko dira munduko kenpo kai txapelketan
Japonian izango da txapelketa, abuztuan. Uxue Arozena, Emma Garmendia eta Lara Garmendia lehiatuko dira bertan.
Beheko ilaran, erdian, Emma, eta haren eskuinean Uxue. Uxueren atzean, Lara. Oiartzun KenpoKai Abuztuan jokatuko dute Japonian munduko kenpo kai txapelketa, eta Oiartzungo hiru neska lehiatuko dira: Uxue Arozena, Emma Garmendia eta Lara Garmendia.
Alain Isasa oiartzuarren irakaslea da, eta pozez kontatu du munduko txapelketan parte hartzeko sailkatua izatea “izugarrizko poza” dela, baina, ohorea izateaz gain, “ardura” badela ere gehitu. du. “Norberak ahal duen guztia eman behar du txapelketa egunean”, jarraitu du.
Aurreikuspenen inguruan galdetuta, Isasak nabarmendu du Emma Garmendia eta Arozena munduko txapeldunak izanak direnez, ez dela “ezer berria” eurentzat. Lara Garmendiaren kasuan, haatik, lehenengoz lehiatuko da txapelketa honetan. Hala ere, irakasleak argi dauka “lan txukuna” egingo dutela hirurek. “Ez dakit irabaziko duten edo ez, baina ez dut zalantzarik beraien aldetik dena emango dutela”.
Isasarentzat, beraz, munduko txapelketara sailkatu izana dagoeneko “sekulako arrakasta” da. “Guk ez dugu bilatzen txapeldunak izatea, gure helburua ez da hori; guretzat garrantzitsuena da gure ikasleak gero eta segurtasun gehiagorekin aritzea eta gero eta osasuntsuago sentitzea. Lehiaketa bada gure arte martzial honetako zati bat, baina ez dena”, amaitu du.
Abuztuaren lehenengotik hamabostera arte izango dira, gutxi gora behera, Japonian, eta munduko txapelketa abuztuaren 10ean jokatuko dute.
