UEMAren elkarretaratze deialdiarekin bat egin du Oiartzungo Udalak
Bi udal taldeek bat egin dute deialdiarekin, eta herritarrak bihar 12:00etan udaletxe aurrean egingo den elkarretaratzera deitu dituzte.
VOX alderdi espainiarraren eskariz, Euskal Autonomia Erkidegoko udal legearen dekretutik baliogabetutako artikulu gehienak atzera bota ditu Espainiako Auzitegi Gorenak, eta, euskara lehenetsiz gero, hizkuntzen koofizialtasuna urratzen dela ebatzi dute sententzian.
Horren aurrean, “euskararen aurkako azken epaia salatzeko eta gure hizkuntzak justizia behar duela aldarrikatzeko” UEMAk bihar (larunbata, hilak 19) 12:00etan udaletxe aurrean deitutako elkarretaratzeekin bat egin dute Oiartzungo Udalak zein euskalgintzako eragileek.
Joana Mendiburu alkateak eta Janire Mitxelena EAJ taldeko bozeramaileak adierazi dutenez, epai hori “oso larria” da. “Euskal gizartearen eta euskal erakundeen erabaki demokratikoaren aurkakoa ez ezik, azken hamarkadetako hizkuntza politiken aurkakoa ere bada, eta euskara beraren ofizialtasuna ere zalantzan jartzen du”. Era berean, nabarmendu dute epaiak Oiartzun bezalako udalerri euskaldunei eta euskaraz aritzen diren udalei eragiten diela.
Ondorioz, bi udal taldeek bat egin dute Euskararekin bat lelopean deitutako elkarretaratzearekin. “Ez diogu uko egingo euskaraz bizitzeari”.
