Euskotren Ligako ohorezko txandan da Hibaika
Asteburuko bi estropadetan laugarren egin dute Iñaki Mendizabalenak, lan bikaina eginda. Gizonen ontziak, hirugarren egin du Portugaleten.
Emakumeak Pasaian larunbatean, gizonak Portugaleten atzo.Aitor Arrizabalaga/ Dani Novas Bikain ari dira Hibaika Arraun Elkarteko bi eskifaiak. Lana txukun eta emaitzak ere horrela iristen ari dira, aldekoagoak batzuetan besteetan baino, baina oro har ezarritako helburuei begiratuta, bidea egoki osatzen.
Eta lan horrek ematen ditu fruituak. Horren erakusle, emakumeen ontzia Euskotren Ligako ohorezko txandan ariko dela asteburuko bi estropadetan laugarren sailkatu ondoren. Pasaian aritu ziren larunbat arratsaldean Iñaki Mendizabalek gidatzen dituenak, eta atzo berriz, Orion.Orio, Tolosaldea eta Hondarribiaren atzetik izan zen laugarren atzokoan Hibaika, eta Arraunen aurretik.
Atzoko estropadaren ostean pozik azaldu zen Eva Lopez Hibaikako arraunlaria, “asteburu oso ona izan da guretzat, helburuak bete ditugulako. Helburua laugarren sailkatzea zen eta bete dugu, poliki poliki. Oso pozik gaude”.
Iñaki Mendizabal entrenatzen duen taldeak egindako lanarekin pozik ere: “Asteburu biribila, atzo eta gaur, laugarren izan gara, baina hurrengo asteburuei begira ohorezko txandan irtengo gara. Oso estropada ona egin dugu azken metroetara arte, hor pixka bat nahastu zaizkigu olatuak eta, baina azkenean asteburua, puntuei dagokionean oso positiboa izan da”.
Sailkapen orokorrean, laugarren dira Hibaikako emakumeak.
Bandera eta hirugarren postua
David Cobjucek gidatzen duen eskifaia ere oso ondo ari da lanean, eta horren erakusle dira emaitzak. Larunbatean arerio zuzena duen Oriori irabazi zion etxean erakustaldi bikaina eginda. Bandera bat gehiago, hirugarrena, Hibaikako senior gizonentzat.
Igandean berriz, Portugaleten aritu ziren. Bandera bila atera ziren errenteriarrak, estropada guztietan egiten duten moduan, baina ez zuten asmatu atzoko jardunaldian eta azkenean hirugarren egin zuten. Sasoi polita egiten ari dira Cobjucenak eta egiten ari diren lanaren emaitza agerian uzten ari dira.
Jano Fariña arraunlariak egin zuen atzoko estropadaren ostean asteburuaren balorazioa. “Asteburu gogorra oso baina balorazio ona egin behar dugu, larunbatean bandera irabazi genuelako eta gaur lehian izan garelako Portugaleterekin bere etxean. Ez dugu irabazi, baina kirolak gauza hauek ditu. Hala ere, bigarren jarraitzen dugu sailkapen orokorrean, play offerako postua da hori, eta taldea ondo ari da lanean egin dugun aurre denboraldiagatik. Baikorra naiz, taldeak bandera gehiago irabazteko aukera du, eta asmo horrekin goaz, banderak irabaztera”.
KAE2 Ligako sailkapen orokorrean bigarren dira Hibaika Arraun Elkartekoak, liderra den Orio B ontzitik bost puntura eta hirugarren sailkatua den Portugalete baino hiru puntu gehiagorekin. Liga irabaztea zail dute lau estropaden faltan, gelditzen diren estropada guztiak irabazteaz gain, Orio Bk hirugarren sailkatu beharko lukeelako horietakoren batean, edo beherago. Hala ere, ez da ezinezkorik, eta hori sinistuta aterako dira uretara Cobjucenak.
Harrera berezia atzo Hibaikako KAE2 Ligako arraunlariei eta Orioko banderari. Jaiak gaur hasiko badira ere, larunbatetik festa giroa nagusi da Errenteria-Oreretan. Atzokoan, madalen aurreko txistulari kontzertua izan zen Zumardian Alaitz eta Maider abeslari gonbidatuekin, eta detaile bikaina izan zuten txistulariek. Entsegua eten eta tartea eskaini zieten Hibaikako arraunlariei bandera astintzeko, baita Txapeldunak doinua jo eta abesbatzak kantatu bildutakoen txalo artean.
Arkaitza tabernan ere egin zien Jone Arrutik harrera Hibaikakoei, etxea parez pare irekita, barra barruraino sartu zituen irabazitako Orioko banderarekin. Ezaguna da Arruti Orio zale amorratua dela.
Hibaikako arraunlariak Orioko Banderarekin Arkaitza Tabernako barra atzean. Argazkia: Dani NovasDani Novas
