Bateleren erregulartasunak saria izan du
Sasoiko hirugarren bandera irabazi zuen atzo 'Batelerak' ontziak. 'Erreka', berriz, larunbatean ederki eta atzo apalago.
San Juango emakumeak, atzo, Portugaleteko banderarekin.San Juan-Koxtape Arraun Elkartea Oro har, asteburu ona izan da San Juanentzat. Batez ere Batelerentzat. Gizonek oso maila ona azaldu zuten larunbatean etxeko estropadan zazpigarren postu oso baliagarria eskuratu zuten sailkapenean ondoan dituenak atzean utzita. Atzo (igandea), berriz, hamaikagarren izan zen Erreka Orion, larunbateko zapore gozoa pixka batean garraztuz. Atzoko zoriona baina, emakumeen traineruen eskutik iritsi zen Portugaleteko bandera irabazi zutelako, sasoiko hirugarrena.
Eraikitze fasean den trainerua da San Juanen emakumeena. Oro har gazte-gazteak dira kirolari gehienak, beteranen ukitu oso baliagarriarekin. Beraz, aurten ETEn egiten ari diren lan erregularra arras goraipatzekoa da, ia beti bigarren eta lehen postuetan izaten ari direlako. Erregulartasun horren seinale, atzo Portugaleten irabazitako bandera. ETEko lider den Zarautz deskuidatzen denean, hor dago traineru arrosa haien aurretik sailkatuz; larunbateko Hernaniren Banderan (Orion jokatu zen) bigarren izan ziren Anartz Gereñok entrenatutakoak. Erregulartasun horrek ETEko bigarren postuan egonkortzera eraman du trainerua, eta erne, Zarautz hiru puntura dutelako; 76 puntu urdinek, eta 73 arrosek. Kontrarioak lokartzen badira, hor izango da Batelerak ontzia meritu propioz banderak irabazteko anbizioarekin.
Gizonen kasuan larunbateko CMO Valves Banderan oso ondo aritu ziren, estropada eremu berrian, etxekoak. Zierbenak irabazi zuen Pasaiakoa, baina azken txandakoek euren lana egin arte podiumean izan zen Erreka. Lan ona, zalantzarik gabe. Atzo, ordea, kontrako asko izan zituen Erreka traineruak, eta horien denaren baturaren emaitza izan zen hamaikagarren izan zirela. Datorren asteburuan beste bi estropada izango dituzte, sailkapenean gora egiteko.
