Berpizkunderako asteburua San Pedron
Larunbatean banderaren jabe egin, eta igandean bosgarren izan zen Libia trainerua Gorlizen. Sailkapenean gora begira jarri dira moreak.
'Libia' trainerua, larunbatean Zarautzen.Sanpedrotarra Arraun Elkartea Aurreko asteburuan, hilaren 12ko Plentziako estropadan 11. izan zen San Pedro, azkenaurren. Zapore gazia izan dute astean zehar moreek. Asteburu honetan, baina, hortzak tenkatu eta gazi zen hura gozo bihurtu dute. Sekulako asteburua egin dute Libia-ko arraunlariek: larunbatean Zarautzen irabazle izan ziren sasoiko lehen bandera lortuz, eta atzo (igandea) bosgarren Gorlizen. Berpizteko asteburua izan da sanpedrotarrena.
Asteburuko bi estropadak itsasoaren egoerak baldintzatu ditu. Estropada eremu gatazkatsuak topatu dituzte bai Zarautzen zein Gorlizen KAE1ko traineruek. Kondizio horietan ere jakin behar da arraunean, txarretik ona ateratzea ez baita erraza. San Pedrok hori lortu du. Jakin dute egoerara moldatu eta horri probetxua ateratzen. Atzo, Gorlizen, Arkote izan zen irabazle (22.13) eta jarraian izan zuen Santurtzi ahalguztiduna (22.22). Bosgarren izan ziren moreak (22.40) Zarautz eta Lapurdiren atzetik. Hemen da San Pedro ona. Agian beranduegi, baina hemen da.
KAE1eko sailkapen nagusian seigarren da Libia. Liderra, nabarmen, Santurtzi da 83 punturekin, eta ondoren Arkote du, 75ekin. Zarautz da hirugarren (74 puntu). Haien atzeko taldean da San Pedro, seigarren, 55 punturekin; aurretik ditu Zumaia (laugarren,, 59 puntu) eta Pedreña (bosgarren, 58 puntu). Azken bi horiek harrapatzea izan behar du helburu moreen traineruak, ikasteko sasoia izaten ari dena, arrakastarako bidean jartzeko. Bandera bat eskuan izanda, errazagoa izango da hori.
