Herri bat taupada bakarrean

Herri dira. Berriro erakutsi dute hori errenteriar oreretarrek kuadrillen egunean, sare sendoa eraiki dutela, baita festarako ere. Palestina eta txosnak gogoan izan ditu marea arrosak.

Ikerne Zarate Gartziarena

Errenteria-Orereta

2025/07/23

Herri dira. Hala erakutsi dute gaur berriro, kuadrillen egunean, herria direla, sare anitza bezain sendoa, baita festetan ere. Pattaletik hasi du eguna eguraldiak, baina kuadrillak abiatu bezala, eguzkiak ere bat egin du marea arrosarekin tarteren batean eta iaz amaiera arte eutsi dio ateri. Jai giroa nagusi, baina aldarrikapenerako ere tarterik izan dute. Madalen kalean, Palestinari keinu egin diote, elkartasuna Errenteria-Oreretatik bertan sufritzen ari diren palestinarrei helarazteko.

Palestinako banderak izan dituzte zintzilik balkoi asko-askotan eta Fermin Muguruzaren Yalah Yalah Ramallah kantuak hartu du kalea.

Alhondegi paretik Herriko Plazaraino bidea Maialen eta Xantik gidatuta egin dute kuadrillen poteora bildutako ehunka eta ehunka lagunek. Bertan aitortza Euskal Herriko txosnei, herri eta hiriburuetako jaien bihotza eta erdigune kulturala direla aitortzeko. Berriro Palestina gogoan.

Gogoan ere Iñaki Badiola Noriega. Aurten zendu da. Hamasei urte zituela hasi zen Errenteriako Erraldoien Konpartsan Iñaki Badiola Noriega oiartzuarra. Apirilean hil zen. Jada konpartsan erretiroa hartua zuen arren, harekin izan zirenek egindako lana aitortu, eta utzi duen hutsune handia nabarmendu zuten. Maialen erraldoia dantzatzen izan zen urte luzez. Haren bihotza izan zen. Migel Erkisekin batera, konpartsa horren arima izan zen. Konpartsa kide izandakoek, hilaren 25ean, Madalen Jaien azken egunean omenduko dute Badiola.

Eta bukatzeko herriari aitortza Aizpea Otaegi alkateak. Ohi moduan udal agintariak ohorezko Agurra dantzatu die herritarrei; ondoan izan ditu alderdi kideak. Bueltan, herritarren txalo zaparrada jaso du Otaegik.

Hirugarren eguna ia erreta, oraindik ere beste bi egun dituzte aurretik errenteriarrek gozatzeko; orain arte bezala, eredugarri. Hala jarrai dezatela. Egitaraua ikusteko egin klik hemen.

Errenteria-Orereta. 2025eko Kuadrilla eguna

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.