Kukaña, ikuskizun betea
OiangozHauren kukañak ez du hutsik egiten. Ikuskizun hutsa da. Oreka ariketa eta zartako artean izan dira partaideak. Ikusleak, gozatzen.
Ez du hutsik egiten. Ikuskizun galanta da OaingozHauren kukaña. Oiatzun ibaiko ertz guztiak jendez bete dira madalenetako ikuskizunik dibertigarrienetakoa izan daitekeenarekin. Ikuskizun betea baika kukañarena. Aurtengo “rzdakiguzenbagarren” ekitaldia izan da, gaur arratsaldean egin da edizio jakinik ez duen herri lehia irristakorra. Orotara 20 partaide izan dira, lau emakume eta hamasei gizon. Gozamena haiena eta publikoarena. Aurten, gainera, ikurrinak jartzen dituenak lan asko egin behar izan du, normalean baino ikurrina gehiago hartu dituztelako partaideek, izan emakume edo gizon.
Bi irabazle nagusi izan dira. Hau da, emakumeen eta gizonen artetik enbor koipetsuan barna ibili, ikurrina hartu, eta egokitutako puntura azkarren iritsi direnak Ana emakumeetan eta Amets izan dira; 300na euroko saria jaso dute biek. Bigarren emakumea Malen, eta gizonetan bigarren eta hirugarren Auritz nahiz Xabier C. Erorketa onenak ere aitortu dituzte epaimahaiko kideek, jai batzordeko kideak haiek. Hala, xelebreen edo egokien erori den emakumea Saioa izan da, eta Errenkoalderen bonua eraman du etxera; gizonetan, berriz, Asier A.-k egin du eroriko onena, eta OARSO BIDASOKO HITZAren urtebeteko harpidetza izan da harentzat. Bosgarren sari bat ere eman dute, Errenkoalderen bonua hura ere: Hodeik, bitan ikurrina hartu dutenen artean azkarrena izan da.
Hitzetan galdu baino, hobe da irudietan murgiltzea kukañak eman duena ulertzeko, eta gozatzeko. Jarraian, bideoa eta irudi sorta handia.
