Haur edo heldu, badago nola ospatu
Atzo hasi ziren santioak, eta Gaztelutxoko igoerarekin ekin diote bigarren egunari. Ondoren, arrantzalez jantzi eta kantu-jira egin dute donibandarrek.
Kaskoa jantzi, irteerara bizikletaz gerturatu, eta abiatzeko agindua entzuterakoan, ziztu bizian abiatu dira Donibaneko haurrak Gaztelutxoko igoerara. 10:30ean zuten hitzordua haurrek, eta bidean gurutzatu dira goizean esnatu eta igoerara zihoazten familia eta etxera edo gosaltzera bidean ziren gaupaseroak.
Txandaka abiatu dira txirrindulariak, bata bestearen atzetik, guraso eta lagunak animoak ematen zituztela. Azken txandan abiatu dira lau txirrindulari helduak, ea gaztetxoenak harrapatzen zituzten.
Txirrinduak plazatik desagertzen joan diren heinean, arrantzalez jantzitako herritarrak hurbiltzen hasi dira. 12:00etatik aurrera kantu-jiran abiatu dira alde batetik bestera, Eperra edo Habanera abesten zeudela, musikarien laguntzarekin.
Santioetan izan da HITZA, eta zenbait irudi eta bideo jaso ditu.
Asteburuko egitaraua
Gaur, hilak 25, Santiago eguna:
- 18:30: Donibaneko XXXV. Dantza solteko txapelketa.
- 20:00: Herri kirolak, Santiago plazan.
- 22:00: Allur dantza taldearen emanaldia, Santiago plazan.
- 23:00: Patty and Pipo, txosnetan.
- 23:30: Itzalpeko Laguna, Santiago plazan.
Bihar, hilak 26, Santa Ana eguna:
- 09:30: Ezinduak beren etxeetan jaso eta Santa Ana ermitara eramatea.
- 11:00: Erraketa txapelketa haur eta gazteentzat, frontoian.
- 11:00: Meza nagusia, Santa Anako ermitan. Ondoren, salda eta pintxo dastaketa, txistulariek girotuta.
- 13:30: Poteoa gramolarekin, Patxikutik plazara.
- 14:30: Kuadrillen bazkari autogestionatua, Santiago plazan. Ondoren, bingoa eta zumba herrikoia. Bukatzean, poteoa kale zaharrean.
- 20:00: Andoni Ollokiegi, txosnetan.
- 21:00: Laket taldearekin erromeria, Santiago plazan.
- 00:00: DJ Lolita, txosnetan.
- 00:30: Itzalpeko laguna, Santiago plazan.
Igandea, hilak 27, San Panteleon eguna:
- 11:00: Karabina txapelketa, frontoian. Hainbat kategoria, adinaren arabera: 8 urtetik behera / 8-12 / 12-15.
- 11:00: Jubilatuen eta arrantzaleen omenezko meza, Bonantzako basilikan.
- 14:00: Jubilatuen bazkaria, Santiago plazan.
- 15:00: Herriko kuadrillek sardinak eta ikatza jasoko dituzte Arizabalon.
- 16:15: Musika herrian barrena.
- 19:00: Sardina jana herri osoan.
- 20:00: Javi DJ, Santiago plazan.
- 22:30: Arrantzaleen danborrada Konstantzia bandarekin. Ondoren, Javi DJ.
- 00:00: Gorka txosnetan.
