Natura guneetara bisita gidatuak
Lau Haizeta parkera, Aiako Harria parke naturalera, Añarbeko baso erreserbara, Azpitarteko haitzuloetara eta Aldura-Igantziko inguruetara bisita gidatuak antolatu ditu Errenteriako Udalak. Abuztuan hasiko dira bisitak, eta urrian izango da azkena.
Beste behin, natura guneetara bisita gidatuak antolatu ditu Errenteriako Udalak. Abuztutik urrira arte Lau Haizeta parkean, Aiako Harrian, Añarbeko baso erreserban, Azpitarteko haitzuloan eta Aldura-Igantziko inguruetan ibiliko dira naturazaleak.
Abuztuaren 10ean egingo dute lehen bidaia. Listorreta-Barrengoloiako informazio bulegoan hasiko dute ibilbidea, eta Azpitarteko haitzuloetarainoko jarraituko dute. Iraganera jauzi egingo dute bisitariek, “Paleolitora bidaia eginez, arbasoen bizileku hura ezagutzeko aukera emanez”. Irailaren 6an eta urriaren 5ean errepikatuko dute bisita.
Hurrengo helmuga Lau Haizeta Parkea eta Monumentu Megalitikoak izango dira; abuztuaren 16an, hain zuzen ere. San Marko gotorlekuko aparkalekutik abiatuko dira, eta hiru orduko ibilbidea egingo dute, Txoritokietako estazio megalitikoa ezagutzeko. Azpitarteko haitzuloetan egingo duten bezala, denboran atzera egiteko txangoa izango da, “estazio horrek historiaurreko hainbat hilobi monumentu mota baititu, hala nola, trikuharriak eta tumuluak”. San Marko eta Txoritokietako gotorleku militarrak ezagutzeko parada ere izango da. Irailaren 14an eta urriaren 11n ere egingo dute bisita bera.
Abuztuaren 24an Añarbeko baso erreserbaren txanda izango da. Idoiatik (Susperregi) abiatuko dira lau orduko ibilaldia egiteko, eta Malbazargo eta Pagosardeko hezeguneetako faunaren berezitasunei buruzko informazioa jasoko dute. Irailaren 20an eta urriaren 19an errepikatuko dute bidaia.
Azken bisita Aldura, Pertsele eta Igantzi mendietara egingo dute, abuztuaren 30an. Idoiatik (Susperregi) hasiko dute ibilaldia, eta “mendi hauen eta Añarbeko urtegiaren inguruan dauden ikuspegi panoramikoen paisaiak ikusi ahal izango dira”. Lau ordu iraungo ditu txangoak, eta Aldurako elur-zulo, basoa lehengoratzeko prozesu, anfibioak babesteko ur putzu eta hegaztien biodibertsitateari buruz ikasteko aukera izango da. Irailaren 28an eta urriaren 25ean errepikatuko dute bisita.
Aurten ere, lau ibilbideak egiten dituena Oarsoaldeko Museoak doan bisitatzeko bi bonu pareren zozketan sartuko da. Irteera guztiak 10:00etan abiatuko dira, eta doakoak izango diren arren, lehenagotik izena eman behar da Errenteriako Turismo Bulegora gerturatuz, 943 494 521 zenbakira deituz, edo turismoa@oarsoaldea.eus helbidera idatziz
Bisita gidatuen egutegia
Azpitarteko haitzuloetara bisita:
- Abuztuaren 10ean, 10:00etan, Listorreta-Barrengoloiako informazio bulegotik.
- Irailaren 6an, 10:00etan, Listorreta-Barrengoloiako informazio bulegotik.
- Urriaren 5ean, 10:00etan, Listorreta-Barrengoloiako informazio bulegotik.
Lau Haizeta parkea eta Monumentu Megalitikoetara bisita:
- Abuztuaren 16an, 10:00etan, San Markoko gotorlekuko aparkalekutik.
- Irailaren 14an, 10:00etan, San Markoko gotorlekuko aparkalekutik.
- Urriaren 11n, 10:00etan, San Markoko gotorlekuko aparkalekutik.
Añarbeko baso erreserbara bisita:
- Abuztuaren 24an, 10:00etan, Idoiatik (Susperregi).
- Irailaren 20an, 10:00etan, Idoiatik (Susperregi).
- Urriaren 19an, 10:00etan, Idoiatik (Susperregi).
Aldura, Pertsele eta Igantzi mendietara bisita:
- Abuztuaren 30ean, 10:00etan, Idoiatik (Susperregi).
- Irailaren 28an, 10:00etan, Idoiatik (Susperregi).
- Urriaren 25ea, 10:00etan, Idoiatik (Susperregi).
