Badatoz sanrokeak
Hilaren 15 eta 16an izango dira Gaintxurizketako jaiak. Hainbat urtez jaiak ospatu gabe egon ondoren, bigarren edizioa izango da aurtengoa.
Gaintxurizketako bizilagunek urte ugari auzoko jaiak ospatu gabe igaro ondoren, joan den urtean auzokideek dinamika berri bat abiatu eta sanrokeak berreskuratu zituzten. Bada, aurten berriz ere antolatu dituzte.
Auzokideek eta Lezoko Udalak lankidetzan egitarau zabala antolatu dute hilaren 15 eta 16rako. Aldaketa batekin heldu da aurtengo edizioa, Antxillastegira lekualdatu baitute agertokia: “Bizilagunek egindako lanaren adibide argia da Antxillastegi, aurten jaiak bertan ospatuko dira bizilagunen auzolanari esker. Urte batzuetan hutsik eta utzita egon ondoren, auzolanean txukundu eta egokitu dute. Elkargune izateko helburuarekin, bertan ospatu ahal izango dira jaiak aurten”.
Ainhoa Salaberria kultur teknikariak azaldu duenez, “buru-belarri” ibili da jai batzordea belaunaldi guztientzako “askotariko ekintzak” prestatzen. Gainera, “Gaintxurizketako jaiak izanik, izaera euskaldun indartsua dute”.
Txupinak eta buruhandien kalejirak emango die hasiera jaiei ostiralean (hilak 15). Ondotik, gaztetxoenentzako toka txapelketa eta afari autogestionatua izango dituzte. Truk txapelketarekin bukatuko dute eguna.
Goizetik hasiko dute larunbateko (hilak 16) egitaraua, toka txapelketa eta herri kirol txapelketa egingo baitituzte. Horren ostean, auzokideen arteko desafioa egingo dute 12:30ean, auzo bazkari eta bingo musikatura joan aurretik. 18:00etan haur eta familientzako jolasak eta txokolatada izango dituzte, baita Lezoko buruhandien kalejira ere. Bukatzeko, afaria eta afalosteko dantzaldiaz gozatzeko aukera izango dute.
Jon Legorburu Lezoko Udaleko Kultur zinegotziak eskerrak eman nahi dizkie bizilagunei, Gaintxurizketako auzokideek “izan duten laguntzeko eta elkarlanerako prestutasunagatik bai eta auzo izaera, lezoartasuna eta kultura indartzeagatik ere. Auzoari ez ezik, herriari ere ekarpen handia egin diote”.
Jaietan ere euskara, berdintasuna eta jasangarritasuna ardatz izango dituzte: “Denon ardura da jai seguru eta gozagarriak egitea”.
