Oiartzungo Poesia Egunak egitasmoaren egitaraua aurkeztu dute
Etxea gai nagusitzat hartuta, Oiartzungo Poesia Egunek "kultur komunitatea etxe bat dela" aldarrikatuko dute irailaren 5etik 11era.
Oiartzungo Poesia Egunak eraldatzen joan den egitasmoa da. Ea-n antolatzen den Poesia Egunak egitasmoan oinarrituta, 2020an sortu zuten Oiartzungoa. Urte hartan Poesia Eguna izena jarri zioten. Zenbait urtez egun bakarreko egitasmoa izan ondoren, hiru egun izatera igaro zen iaz, eta aurten astebetera luzatzeko apustua egin dute.
Irailaren 5etik 11ra poesia erdigunean jarri eta naturarekin erabat konektatuta dagoen egitaraua antolatu dute [egitaraua behean aurki daiteke]. Aurtengo gai nagusia Etxea izango da; izan ere, “etxea ez da ezer, baina etxea dena da”, antolatzaileen esanetan. “Etxea hotzetik babesteko sortu zen, zure ondasun apurrak gordetzeko bide, maite duzun jendearekin elkar zaintzeko espazioa”.
Baina aldi berean, kontrakoa ere izan daitekeelako hautatu dute aurtengo gai nagusitzat. “Ihesbide zaileko presondegia edo atea zabalik duen kaiola izan daiteke tratu txarrak jasaten dituenarentzat. Etxeak babesa ematen dizun teilatupea behar luke, mundu honetan lasai lo egin daitekeenaren promesa; azkenaldian, Palestinan bezala munduko beste hainbat lekutan, ordea, kontrakoa ere ikusi dugu. Bota dezakeela norbaitek etxea zure gainera, edo beti okerragoa dena, maite duzun horien gainera teilatupe oso bat. Erakunde publiko eta pribatuak ere etxe gisa eraikitzen ditugu jendarteok, ematen diegu denon mesederako botere bat, baina gehiegitan ikusten dugu nola botere horrek azkarregi egiten dion ihes komunitateari besteen eskuetan. Horren adierazle izan daiteke desjabetzeen gatazka, hainbestetan teilatuperik gabe geratzen ari diren familien gaiak erakusten duen erakundeen aurpegi zitala”.
Dena dela, antolatzaileen ustez, beti dago pertsona multzo bat etxearen jatorrizko zentzura bueltatu nahi duena: “Begiratu besterik ez dago, gatazka orotan topatuko duzu gatazka horren beste aurpegia erakusten dizun jendea. Ez dugu gutxitan entzun, «hemen egotea etxean bezala egotea da», «sentitu zaitez etxean bezala» edo, lagun bati maitasunez, «zu zara nire etxea»”. Aurtengo Oiartzungo Poesia Egunek, beraz, “kultur komunitatea etxe bat dela” aldarrikatuko dute.
Azkenik, egitasmoa “saretuta” antolatzen dituzten kolektibo zein pertsonek “halakorik behar duenarentzat” etxe bat izan nahiko luketela adierazi dute.
EGITARAUA:
Irailak 5, ostirala:
17:30ean: Tantai esperientzia sonoroa, Putxutxoerrekan. (Ainara Lasa).
19:00etan: Heriotzak Eduardo du izena. Poesia ez-errezitala. Formol Laborategia.
Landetxen. Sarrera: 5 euro
Irailak 6, larunbata:
11:00etan: Ergoienetik Ergoienera, ibilbide poetikoa.
14:00etan: bazkaria Auzokalten. Sarrera 10 euro. Erreserbak: poesiaegunak@gmail.com
18:30ean: Etxe bat poesia errezitaldi musikatua. (Yolanda Arrieta eta Peru Galbete).
Landetxen. Sarrera: 5 euro
Irailak 8-9-10:
19:00etan: Poeta bat zure sukaldean. Errezitaldiak herritarren etxeetan. (Harkaitz Cano, Itziar Ugarte, Jose Luis Otamendi).
Irailak 11, osteguna:
19:00etan: Haur eta gazteen poesia emanaldia Iturriozko Dorretxean.
