'Heriotzak Eduardo du izena' ez-errezitaldirako sarrerak, salgai
Formol laborategiak Poesia Egunen lehenengo egunean taularatuko du bere lana. Sarrerak eros daitezke webgunean.
Intza Alkain Edurne Azkarate eta Mikel Ibarguren dira antzezleak. Ostiralean hasiko dira Oiartzungo Poesia Egunak, eta ordurako bi zita jarri dituzte. Lehenik eta behin, Ainara Lasa Perezek Tantai izeneko “esperientzia sonoroa” instalazioa egingo du. Putxutxoerrekan izango da, 17:30ean hasita.
Ondoren, Formol laborategiaren txanda izango da. Heriotzak Eduardo du izena izeneko “poesia ez-errezitaldia” izeneko lana taularatuko dute Landetxeko auditorioan. 19:00etan hasiko da, eta sarrerak online eskuragarri daude, 5 euroren truke.
Poesia Egunak hilaren 5etik 11ra bitartean izango dira, egitarau interesgarriarekin.
SINOPSIA
Mundu Poesia Kaierak poesia liburu bildumak 10 urte betetzen dituen honetan, Susako lagunek bizirik dauden poetak hil nahi zituztela esan zieten formoldarrei. Haiek metaforikoki esan omen zuten, baina Formolekoek lana serio hartu dute…
Heriotzak Eduardo du izena esperimentu bat da, soinu instalazioa, performancea eta antzerkia uztartuko dituena, fisikoa eta birtuala denaren arteko mugak esploratuz eta publikoa eta agertokiaren arteko barrera tradizionalak ezabatuz. MPK jolas eszeniko bilakatu da. Poemek gai unibertsal eta sakonak lantzen dituzte, hala nola, bizitza eta heriotza, eztanda eta bakea, gelditasuna eta bibrazioa edota isiltasuna eta kantua bezalako dualitateak. Horiek proposamen dramaturgiko bilakatu dira, bizipen sentsorial bat eragiteko paisaia (edo pantaia) bat marraztuko da oholtzan, bideojoko batean bezala.
