Trintxerpe Illunbe, egoera kritikoan
Kluba instalazio gabe geratu da, eta ez du espaziorik arraunean jarraitzeko. Berehalako irtenbide bat topatzen ez badute, hilabete bukaeran klubak ateak itxi beharko ditu. Zuzendaritzak urgentziazko laguntza eskatu du.
Trintxerpe Illunbeko beteranoak. Trintxerpe Illunbe Arraun Elkartea 1987an sortutako arraun talde bat da. Trintxerpetarrek ia lau hamarkadako bidea osatu dute arraunari ahotsa ematen eta kirol horren balioak lau haizetara zabaltzen. Hasieratik erronka ugariri aurre egin behar izan diete, baina egungo egoerak kolokan jarri du klubaren etorkizuna.
Gainerako klubek ez bezala, Illunbeko zuzendaritzak adierazi du haiek ez dutela inoiz izan instalazio “duin eta egonkorrik”. Trintxerpeko klubean “prekarietatea eta behin-behinekotasuna” etengabeak izan direla salatu dute, eta uneoro egokitu behar izan dira “aurkakotasunetara”. Egoera, baina, “kritiko” bihurtu da, Portu Agintaritzak kluba bere instalazioetatik desalojatu baitu. Hori dela eta, Illunbe lokal gabe geratu da, eta ez dute espazio bat arraunean jarraitzeko. “Berehalako” irtenbide batera iristen ez badira, zuzendaritzak jakinarazi du klubaren “itxiera eta desagerpena saihestezinak” direla. Irtenbide bat topatzen ez badute, klubak ateak itxi beharko ditu hilabete bukaeran.
Egoera horren aurrean, Illunbeko zuzendaritza Gipuzkoako Foru Aldundiarekin, Portu Agintaritzarekin eta Pasaiako Udalarekin elkartu da “urgentziazko” laguntza eskatzeko eta klubaren jarraipena bermatzeko. Hala ere, erakundeen erantzuna “urria” izan dela salatu du zuzendaritzak:
- Aldundiak Illunberen laguntza eskaera ukatu du.
- Portu Agintaritzak enpresa bat gehiago bezala tratatu du kluba, nahiz eta urte horietan 50.000 euro baino gehiago ordaindu dituen instalazioen erabileragatik.
- Udalak ezintasuna adierazi du lokal bat emateko, gainerako klubek duten bezala.
“Ezezko” horiek eta errekurtso faltek “behin betiko” itxierara eramango dituela salatu du Illunbek.
Klubaren inpaktua
Egoera aurkakoa izan arren, arraunlari mordoa ari dira Trintxerpen arraunean. Egun, beteranoen bi eskifaia dituzte, bat emakumeena eta bestea gizonena. Horiez gain, harrobiko taldeak ere baditu Illunbek. Irtenbide bat bilatzen ez bada, pertsona horiek guztiak arrauna egiteko aukerarik gabe geldituko direla esan du klubak, etsipenez.
Gauzak horrela, Trintxerpe Illubek “urgentziazko deia” egin die tartean dauden erakunde guztiei, haien egoera “birpentsatzeko” eta haien artean kolabora dezaten “irtenbide bideragarri” batera iristeko. Aldundiari, Jaurlaritzari, Portu Agintaritzari eta udalari “indarrak batzeko eta alternatiba bat aurkitzeko” deia luzatu die zuzendaritzak, klubak aurrera egin ahal izateko eta arraunaren tradizioa Trintxerpen bizirik mantentzeko.
