Asteburuan hasiko da Enrike Abril Errebote Txapelketa
Euskal Herriko zortzi talde arituko dira lehian, tartean Oiartzungo Txost. Hiru plaza izango dira joko-zelai; Oiartzungo Beheko Plazak ez du hutsik egingo.
Iazko ekitaldiko finaleko irudia, Luzean eta Txost parez pare eduki zituena [Arg.: gipuzkoapilota.eus]. Erremintarekin jokatzen den pilota modalitateen artean txapelketa mitikorik bada, hori Enrike Abril errebote txapelketa da. Aurten jokatuko dute 62. ekitaldia, eta zortzi talde arituko dira lehian. Tartean izango da Txost, Oiartzungo taldea.
Gipuzkoako beste hiru talde arituko dira: Zubietako bi eta Villabonako Behar Zana. Beste hiru talde Lapurditik etorriko dira: Kanboarrak (Kanbo); Luzean (Donibane Lohizune); eta Senpere. Baigorriko (Nafarroa Beherea) Zaharrer Segi taldeak osatuko du lehiakideen multzoa.
Partida guztiak Gipuzkoako taldean etxeetan jokatuko dituzte: Zubietan, Villabonan eta Oiartzungo Beheko Plazan. Asteburu honetan Oiartzunen bi partida ikusteko aukera izango da, meteorologiaren baimenarekin betiere.
Finala, dena ondo bidean, urriaren 19an jokatuko dute, Zubietako plazan.
Honakoa izango da asteburuko kartelera:
Larunbata, hilak 6
- Luzean — Kanboarrak. 10:30ean, Oiartzungo Beheko Plazan.
Igandea, hilak 7
- Zubieta 1 — Senpere. 10:30ean, Zubietako plazan.
- Txost — Zaharrer Segi. 10:30ean, Oiartzungo Plazan.
Jarraipena egiteko, Gipuzkoako Pilota Federazioak atala sortua du bere webgunean.
