Zazpi atxilotu, borroka batean parte hartzeagatik
Ertzaintzak atxilotu ditu zazpi gizonak janari denda batean liskar iskanbilatsu batean parte hartzea egotzita.
Zazpi atxilotu eta ikertu bat Errenteria-Oreretan borroka batean parte hartzea egotzita. Atzo arratsaldean izan zen gertakaria eta Eusko Jaurlaritzaren Segurtasun Sailak zabaldutako informazioaren arabera, 24 urtetik 42 urtera arteko zazpi gizon dira atxilotuak. Janari denda batean liskar iskanbilatsu batean parte hartzea egotzi diete guztiei eta iturri berak azaldu duenez, borrokan aritu zirenek saltokiko objektuekin eta arma zuriekin egin zioten eraso elkarri.
Udalerriko Erdialdeko establezimendu batean izan zen liskarra arratsaldeko bostak aldera, eta Segurtasun Sailaren arabera borrokan parte hartu zuten zazpi gizonek arma zuriak eta saltokiko bertako objektuak, hala nola, erosketa saskiak edo jakiak erabili zituzten elkarri eraso egiteko.
Atxilotuei liskar iskanbilatsuetan parte hartzea, lesioak, eta kalteak eragitea leporatu diete. Ertzainek, aiztoa, labana bat, bihurkin bat, eta debekatutako defentsa spray bat konfiskatu zizkieten prentsa oharrean adierazitakoaren arabera. Atxilotuetako batek eta establezimenduaren arduradunak mediku arreta behar izan zutela liskarraren ondorioz ere zehaztu dute iturri berberek.
Atxilotutako zazpi lagunak ertzain etxean dituzte eginbideak bukatu eta epaileen esku utzi zain.
