Jaizkibelgo barrakoiak ezagutzeko gonbita egin du Oarsoaldeak
Egun barrakoi bakarra kontserbatzen da, eta gune hori bisita eta bertan gertatutakoa ezagutu daiteke. Barrakoietan Francoren erregimenean Jaizkibelgo errepidea eraikitzera behartutako gerrako presoak egon ziren.
Oarsoaldea Garapen Agentziak Lezoko Ezkutuko Memoria: Jaizkibelgo barrakoietarainoko ibilaldia izeneko irteera egitera gonbidatu nahi ditu herritarrak, historia hurbilaren zati ahaztua berreskuratzen duen bidea egin dezaten. Txoko hori Lezoko hirigunetik gertu dago, Jaizkibelen. Oarsoaldean eta Bidasoan izan ziren lan behartuetako 13 zelaietatik, bakarra kontserbatzen da egun. 1939an eraikitako barrakoi horietan Francoren erregimenean Jaizkibelgo errepidea eraikitzera behartutako gerrako presoak egon ziren.
Etxetxo – Lezoko Memoria Historikoaren Elkartearen lanari esker, gune hori bisita eta bertan gertatutakoa ezagutu daiteke. Ibilaldia zailtasun ertain-baxukoa eta ordubetekoa (joan-etorria) dela adierazi du garapen agentziak. Bisitariak naturaren eta oroimenaren artean ibiliko dira, eta Sorotxo eta Iparragirreko parajeak ezagutuko dituzte. Informazio gehiagorako, Etxetxok, Aranzadik eta Lezoko Udalak gertatutakoari buruzko webgune bat dute interesdunen eskura.
