Aurrera urratsik ez etxez etxeko langileen auzian: greban jarraituko dute
Langileek, zerbitzua esleituta duen enpresak eta udalak negoziazio batzarra egin dute gaur. Emaitza baikorrik ez da izan, langileen ustez.
Etxez etxeko langileak, gaur, udaletxearen aurreko elkarretaratzean. Pasaiako etxez etxeko langileek irailerako deitu duten grebarekin jarraituko dute. Aurretik, nahiz hilabete honetan egin dituzten borrokaldi egunak batuz gero, 15. greba eguna dute gaurkoa. Eguna gorriz markatua zuten langileek: Pasaiako Udalak, zerbitzua kudeatzen duen enpresak (Matia Goxara) eta langileen ordezkariek batzarra egin dute gaur, 43 langileen lan baldintzak hobetze aldera hitzarmen duina landu eta aurrera urratsak egitea xede. Ez da horrela izan, aurrera urratsik ez da izan. Enpresaren jarrerari egotzi diote beharginek aurrera egin ez izanaren ardura: “Udalak proposatutako hobekuntzak bere onurarako erabili nahi ditu enpresak. Negoziazioa blokeatu du Matia Goxarak”. Hein berean zerbitzua publifikatzeko bidea arintzeko nahiz hitzarmen duina izateko baldintzak eskatzeko baliatu dute langileek bilkura. Horren ondoren udaletxearen atarian elkarretaratzea egin dute.
Aurrera egin baino, kontrako norabidearen alde egin duela enpresak azaldu dute langileen ordezkari diren ELA eta LAB sindikatuek: “Udalak hitzarmena hobetzeko agindu dituen baliabide ekonomikoak bere etekinetara bideratu nahi ditu Matia Goxarak. Langileen baldintzak prekarioak dira”. Ituna hobetzeko honako baliabideak ezarri ditu udalak: urteko 25.500 euroko soldata gordina langileentzat, gutxieneko asteko lanaldiak 28 ordukoak izatea, eta langileek gaixotasun arruntak dituztenean baja hartu behar izatekotan soldata osotasunean jasotzea, besteak beste.
Udalaren planteamenduarekin ados dira oro har langileak. Alta, hobekuntza horiek enpresak bere mesederako erabili nahi dituela berretsi dute gaurkoan ere langileek, eta horrelakoak ekiditeko zerbitzua publiko eta zuzenean udalaren menpeko izatea beharrezkoa dela aldarrikatu dute.
Urrian aterako du Pasaiako Udalak zerbitzuaren lizitazio berria. Horren araberako lan itunaren negoziazioak oker doazela azaldu dute langileek, “enpresak atzera egin du, denbora galdu eta negoziazio epea laburtuta”.
