Cacahuetefest muntai polizialei aurre egiteko
Herritar talde batek salatu duenez 2023ko San Tomas egunean muntai polizial bat eman zen herrian. Horren ondorioz, 9.375 euroko isuna eta 3 urteko espetxe zigorra eskatzen dute herritar baten kontra.
All cacahuetes are bastards! Muntai polizialik ez! lelopean antolatu dute cacahuetefest All cacahuetes are bastards! Muntai polizialik ez! lelopean cacahuetefest antolatu dute hainbat herritarrek. Elkartasun sozial eta ekonomikoa lortzea du helburu herritar arteko babes sarea josita.
Jaialdiaren gainekoak azaltzeko idatzia plazaratu dute iniziatibaren atzean diren herritarrek. Bertan salatu dute udaltzaingoak herritarrenganako “jarrera oldarkorra” duela, eta “aski ezaguna” dela hori: “Urteotan asko izan dira jarrera horien eredu garbiak. Herrian zehar rallyak egiten eta halako beste asko konta genitzake”.
“Handikeria” egotzi diote udaltzaingoari, “eta handikeria hori herritarren kontrako indarkeri” bihurtzea. Bi urte atzera egin dute, zehazki, eta 2023ko San Tomas Egunean ondorio larriak ekarri dituen “muntai poliziala” eman zela herrian jakinarazi: “Udaltzain bat pertsona bat jarraika ari zela estropezu egin zuen eta hortxe hasi zen dena”. Azaldu dutenez, herritar bat zen ondoan eta erorketaren ardura hari egotzi ziola udaltzainak azaldu dute, “ondorioz, gaua kalabozoan pasa behar izan zuen”.
Epailearen aurrera eraman zuten herritar hori hurrengo goizean eta epaiketaren zain geratu zen, “epaiketa ez iristeko xantaiapean 9.375 euroko kalte ordaina eskatu zuen udaltzainaren abokatuak. Muntai polizial bat dela argi izanda, herritar honek hau ez onartu eta epaiketara joateko beharra ikusi du”.
Gauzak horrela, lesio eta autoritatearen kontrako delituak egotzi dizkiote herritarrari, “9.375 euroko isuna eta 3 urteko espetxe zigorra”. Horren aurrean, ezinbestekoa ikusi du herritar taldeak elkartasun sozial zein ekonomikoa aktibatzea herrikidea babesteko, “gastuak ez dira nolanahikoak izango eta ondorioak deuseztatzea denon esku dago. Nahikoa da herritarrekiko harrokeriaz jokatzeaz”. Babes ekonomiko eta sozial hori ehuntzeko hitzordua egin dute azaroaren 8an. Gaztañoko frontoian bazkaria eta kontzertuak egingo dituzte. Ez dute momentuz informazio gehiago zabaldu, baina aurreratu dutenez, data gerturatu ahala emango dute zehaztasun gehiago.
Cacahuetefesten parte hartzera eta herritar babes sarea sortzera deitu dute azkenik, “babes gaitezen gure artean, poliziak ez gaitu inoiz babestuko-eta”
