Aiur Illarreta Beñaran, handi Europan
Kayak surf kirolari lezoarrak urrezko bi domina irabazi ditu bakarka Europako Txapelketan. Euskal selekzioak, osotara, bederatzi urre egin ditu bere.
Aiur Illarreta (ezkerrean) Eñaut Calvo selekziokidearekin. Kayak surfean eta waveskian mundu mailako potentzia da Euskal Herria. Horren seinale, hilaren 4tik 9ra Irlandan egin den Europako Kayak Surf eta Waveski Txapelketan bederatzi urrezko domina lortu dituztela (zazpi zilarrezko, eta hiru brontzezko ere bai) Euskal Selekzioko kirolariek. Emaitza bikain horietan zerikusi zuzena izan du Aiur Illarreta Beñaran lezoarrak: bakarka bi urrezko lortu ditu Open kategorian (adin guztietako kirolarien kategoria), bana piragua motzarekin zein luzearekin. Horri, taldekako urrea erantsi behar dio gazteak. Beraz, etxeko apalak beste hiru urrezko biribilkirekin beteko ditu. Europakoaren dominen palmares osoa ikusteko, baliatu esteka hau.
Irlandako Sligo eskualdeko Easkey herrian izan da kirol modalitate horretako Europako Txapelketa. Hango Easkey left olatu luze eta indartsuetan trebe-trebe jardun dira euskal kirolariak, domina gehien lortu dituen selekzioa izateraino; hiru metroko olatuak ere izan dituzte, baldintza meteorologiko aldakorrekin. Aurrean izan ditu Euskal Selekzioak Irlanda, Ingalaterra, Frantzia, Eskozia, Espainia, Danimarka edo Man Uharteetako kirolariak; Australia, Hegoafrika eta Argentinako selekzioek gonbidatu bezala parte hartu dute.
2024ko Munduko Txapelketan Open Mailako bi kategorietan (piragua luzea eta motza) txapeldun izan zen lezoarra, Argentinan. 2023ko Europakoetan, Galizian, urrezkoa izan zen Openen ere bai, kasu horretan piragua luzearekin. 2022ko Kayak Surfeko Munduko Txapelketan, Ingalaterrako Bude herrian, Junior Mailan bitan izan zen irabazle lezoarra, ontzi laburretan eta luzeetan.
Illarretaren adierazpenak lortzear da hedabide hau, Irlandatik bueltan baita kirolaria. Horiek jasotakoan, lezoarraren iritzi eta balorazioak irakurri ahal izango dituzte HITZAren jarraitzaileek.
Jarraian, Agus Illarretak eta Chris Hobsonek egindako bideoekin muntaia, Illarretak egindako saioenak.
