Denboraldi berria aurkeztu du Errenteria Atletismo Taldeak
80 haurrek eman dute izena Atletismo Eskolan, eta oraindik ere izen ematea zabalik dago.
Errenteria Atletsimo Taldeko aurkezpen eguneko irudi bat. Errenteria Atletismo Taldeak denboraldi berria aurkeztu zuen asteartean. Izen emateak izan duen arrakastarekin pozik azaldu dira elkarteko arduradunak, izan ere, oraindik ere matrikula epea zabalik izanik, 80 haurrek eman dute izena atletismo eskolan aritzeko denboraldi berrian.
Eskolan zein antolatutako gainontzekoetan ere izena emateko aukera zabalik dagoela gogorarazi dute. Horrela, atletismo eskolan, 2012 eta 2017 urteen artean jaiotakoek eman dezakete izena; federatu adingabeen taldean 2006 eta 2011 urteen artean jaiotakoek; master federatu taldean 35 urte artekoek, edota 1989 eta 2005 urteen artean jaioak; entrenamendu funtzional taldean, indarra, mugikortasuna, erresistentzia eta egoera fisikoa hobetzeari begira aire librean; eta running taldean, maila guztiei begira. Berritasun gisa running soziala antolatu dute, doakoa da eta larunbatetan egingo dute giro lasaian.
Beste berritasun bat ere bada aurten: CAR Fit. Prestaketa fisikoa hobetu nahi duten 14 urtetik gorako gazteei begira.
Aste honetan zehar jarduera guztiak zabalik izango dira nahi duen orok konpromiso gabe probatzeko aukera izan dezan. Denboraldia, “ilusioarekin, motibazioarekin eta laguntzaile berriekin” hasi dutela esan dute bukatzeko Errenteria Atletismo Taldeko ordezkariek, “hazten jarraitu nahi dugu eta herritarrei kalitatezko kirol espazio bat eskaintzen”.
Errenteria Atletsimo Taldeko aurkezpen eguneko irudi bat.
