Itsastarrak Mendi Taldeak 75 urte bete ditu
Trintxerpeko mendizale taldeak ospakizun ekitaldi bat antolatu du urriaren 4rako, egun osoko egitarauarekin.
Trintxerpeko Itsastarrak Mendi Taldeak 75 urte bete ditu, eta urteurren berezi hori herriarekin ospatu nahi du. Horretarako, ospakizun ekitaldi bat ondu dute urriaren 4rako, egun osoko egitarauarekin. Goizean Ciudad de San Sebastian ontzira igoko dira, Donostiako portuan. Mendizaleek kostalde osoan zehar nabigatuko dute, Jaizkibeleko magalera gerturatu arte. Bertan, Labetxu edo Koloreen Harana ikuskatuko dute. Eremu horretan hareharrizko arrokek intentsitate handiko kolore paleta eskaintzen dute. Labetxu bisitatuta, Pasaiako badian bukatuko da hiru orduko itsas zeharkaldia. Ondoren, herri bazkaria egingo dute Trintxerpeko frontoian. Bazkariak 15 euroko kostua du, plaza mugatuak daude, eta aurrez izena ematea beharrezkoa da.
Itsastarrak-eko kideek herritarrekin ospatu nahi dute egun handi hori, eta dei egin diete parte hartzeko. Harremanetarako 659 63 77 02 telefonoa eta helbide elektronikoa jarri dituzte interesdunen eskura.
