Lezoko Testu Laburren Lehiaketarako sei finalistak aukeratu dituzte
Hamaika testu jaso, eta horietarako sei sailkatu dira finalera. Urriaren 4ean egingo dute irakurketa dramatizatuen partida.
Lezoko III. Antzerki Testu Laburren Lehiaketarako hamaika lan jaso dituzte, eta horietako sei hautatu dituzte finalerako. Zenbait irizpide hartu dituzte kontuan, hala nola, testuaren kalitatea, egileen arteko parekidetasun eta adina.
Gauzak horrela, Eneritz Artetxe Aranaz, Markos Goikolea Unzalu, Xabin Fernandez Zubeldia, Goizeder Iturain Aramendi, Jurgi Sarasola Artola eta Idoia Garzes Aldazabal igaro dira finalera. Mireia Gabilondo aktoreak, Mikele Urroz aktoreak eta Agurtzane Intxaurragak osatu dute epaimahaia.
Gainera, liburuxkan Martin Antxia Abasoloren testua ere gehitzea erabaki du epaimahaiak, “bere kalitateagatik”.
Hortaz, irakurketa dramatizatuen partida urriaren 4ean izango da, 19:30etik aurrera Lezoko Herri Eskolako patioan.
