Aho batez onartu dituzte udal bilkurako gai guztiak
Zergak, etxebizitza eta hondakinak izan dira nabarmendutako gaiak. EAJk poztasunez adierazi du bi alderdien arteko lanketa.
Asteazkenean egin zuten iraileko udal osoko bilkura. EH Bilduko eta EAJko zinegotziek aho batez onartu zituzten jorratutako hamabi gaiak. Haien artean, Oiartzungo Udalak nabarmendu du 2026rako zerga ordenantzen aldaketa onartu egin dutela.
Udalak zerbitzu publiko duina emateko asmoarekin, Joana Mendiburu alkateak adierazi zuen diru sarrera nahikoak lortzea dutela xede. Horretarako, indarrean dauden prezioak %3 eguneratuko dira (urteko KPIaren baitan). Halere, udalak adierazi du zerbitzu garrantzitsuenen tarifan ez dutela igoerarik nabarituko, hala nola etxez etxeko arreta zerbitzuan eta taxi busan.
Ordaindu beharreko tassak eta zergak bakoitzaren diru sarreren arabera zehaztuko dira. Horren harira, errenta gutxiko familiak laguntzeko neurri ezberdinak jaso dituzte, Oiartzungo Udalaren helburuetako bat “egoera zaurgarrian dauden oiartzuarrak” laguntzea baita. “Kohesiorako eta egoera zailean dauden herritarrak babesteko hobari eta salbuespenak mantenduko ditugu eta besteak beste, ura eta hondakinen tasa ez dute ordaindu beharko edota tarifa murriztua izango dute etxez etxeko laguntza zerbitzuan eta kiroldegian”.
Jorratutako beste gaien artean izan zen etxebizitza. Herrian dauden etxe hutsak alokairurako bideratu nahi ditu udaletxeak, eta hori lortzeko lehen pausoak ematen hasiak dira. Etxebizitza hutsa duten jabeek Ondasun Higiezinen Gaineko Zergan %100eko gainkargua ordaindu beharko dute, eta %50eko hobaria izango dute etxebizitza Bizigune edo ASAP programen bidez alokairuan jartzen badute.
Aho batez ere, Oiartzun tentsio eremu izendatzeko lanketari hasiera ematea erabaki zen. “Iaz lanketa egiteko saiakera egin genuen, baina Oiartzunek ez zituen eremu tentsionatu izateko baldintzak betetzen”, esan zuen alkateak. Orain, Eusko Jaurlaritzak egindako berrazterketa bat dela eta, baldintzak bete ditzakeela dirudi. “Orain arte hainbat neurri hartu ditugu etxebizitza eskubidea bermatzeko. Horretarako udalaren eskumenak mugatuak diren arren, tentsio eremu izendatuta neurri gehiago hartzeko gaitasuna izango dugu”.
Hondakinen tasa, gora
Trantsizio ekologikoa udalak nabarmendutako gaia izan zen. Horren harira, erabaki zuten hondakinen tasa %18 igoko dutela, Europako hondakinen legea betetzeko. “Legeak zehazten du hondakinen kudeaketak ezin duela defizitarioa izan; hondakinen tasak ordaindu behar duela kudeaketa gastu guztia. Ezohiko igoera honekin ez dugu helburua guztiz lortuko, baina udaletik bagabiltza gastua kontrolatzeko eta beste sarrera batzuk lortzeko etxeko-lanak egiten eta uste dugu horrekin iritsiko garela gastu eta sarreren orekara”.
EAJko ordezkariek ordenantza babestu egin zuten, haien bozeramaile Janire Mitxelenak adierazi zuenez, proposamen “orekatua” eta berrikuntza “oso positiboak” baititu. Hondakinen inguruan lortutako adostasuna azpimarratu zuen Mitxelenak: “Urteetan eztabaida gogorra eragin duen gai bat lantzeko elkarrekin eseri, egoera aztertu eta sistema hobetzeko proposamenak lantzea lortu dugu, guztion ekarpenak aintzat hartuta. Helburu nagusia oiartzuarren ongizatea bermatzea da eta gaurko proposamena norabide horretan urrats berri bat da”.
