Erretiroa hartuta, baina ez erretiratuta
Erretiratuen elkarteek jarduera aukera zabala antolatu dute beste behin ere. Gaur eman dute ikasturte berrirako antolatu duten eskaintza zabalaren berri.
Erretiratuen elkarteek eskaintza zabala ondu dute aurten ere. Erretiratuen elkarteek jarduera aukera zabala antolatu dute beste behin ere. Gaur eman dute ikasturte berrirako antolatu duten eskaintza zabalaren berri Errenteria-Oreretako zortzi erretiratuen elkarteek Aizpea Otaegi alkatearekin batera Galtzarabordako El Parque erretiratuen elkartean egindako agerraldian.
Elkarte horiek, Errenteria-Orereta “herri bizia” den erakusle garbia direla esan zuen Otaegik. San Agustin, Arramendipe, Bienvenido, Laguntasuna, El Parque, San Jose, Beti Bizkor eta La Magdalena elkarteek urteak daramate herriko erretiratu eta pentsiodunentzat kultura, kirol eta aisialdirako jarduerak eskaintzen.
Zortzi elkarteen artean, 3.000 bazkide dituzte, eta ondutako programazioarekin, gainera, horietara baino pertsona heldu gehiagorengana iristen dira, elkarteak sozializazio eta elkar topaketarako gune garrantzitsu bilakatuz. Jarduerak eskaintzen dituzte bertan, baina horrekin batera, aukeratua ez den bakardadeari aurre egiteko espazio ere bilakatzen dira elkarte horiek.
Ehun jardueratik gora
Datorren astean abiatu eta 2025eko maiatzera arte antolatu duten programaziora 100 jarduera baino gehiago bildu dituzte, eta horietan, 1700 pertsona inguruk hartuko dute parte. Eskaintzaren barruan, askotariko jarduerak: garapen kognitiboa, jarduera fisikoa, dantza, kultura, hizkuntzak eta askotariko tailerrak dira aukeran. Adierazgarria da kopurua Otaegik nabarmen jarri duenez, izan ere 10.000tik gora dira 65 urte edo gehiago dituztenak udalerrian, eta horien artetik, %17k egingo du bat antolatutako ekintzetan.
Jardueretan parte hartzeko izena eman behar da eta horren gaineko informazioa elkarteetan eskura daiteke, bai telefonoz, baita aurrez aurre ere.
Aizpea Otaegik esan du erretiratuen elkarteetatik egiten duten lana oso garrantzitsua dela udalerriarentzat , “zorionak urtero gainera, eskaintza berritzen eta egokitzen joaten zaretelako. Eskerrik asko, beraz ardurak dituzuenek lan handia egiten baituzue hauek denak martxan jartzeko”. Ardura handia dutela, baina egiten duten horrek herriarengan duen eragina “ordainezina” dela ere esan die bertaratutako klubetako ordezkariei udal agintariak”.
Jende asko biltzen da antolatutako ekintzetara baina hala ere, gaurko agerraldian klubeko ordezkariek nabarmen du dutenez, kosta egiten zaigu jende gehiago animatzea, “zaila izaten da jende gehiago erakartzera, kosta egiten zaio jendeari gerturatzea”. Ildo horretatik, deia zabaldu dute 65 urtetik gorako pertsonak gertuen duten erretiratuen elkartera jo dezaten lehen eskutik ezagutzeko bertako eskaintza eta giroa, “ez zaie damutuko”.
Antolatutako tailerrak ikusteko, klikatu hemen.
