Berdintasun Kontseilua sortzeko azken bilera egingo dute astelehenean
Kontseiluaren sorrera prozesua bukatzearekin batera, horren osaera guztiz fintzeko topaketa izango da astelehenekoa.
Kontseilua sortzeko batzarretako baten artxiboko irudia. Bukatzear da Lezoko Berdintasun Kontseilua sortzeko prozesua. Astelehenean egingo dute sorrera aro horren azken batzarra, 19:30ean, Kultura Aretoan. Orain arte partaide izan diren herriko eragile eta elkarteez gainera, nahi duen orok bertan parte har dezakeela adierazi du udalak. Udalak eta Gipuzkoako Foru Aldundiak lagundutako prozesua izan da hilaren 29an bukatuko dena. Kontseiluaren sorrera prozesuaren azken topagunea izatearekin batera, horren osaera guztiz fintzeko topaketa izango da astelehenekoa.
Hilabete askoko lana izan da kontseilua sortzearena. Elhuyar Aholkularitzaren gidaritzapean egin du bidea herrian emakumeen parte-hartze, ahalduntze eta protagonismoa sustatzeaz gain, berdintasun udal politikak era planifikatuan, koordinatuan eta elkarlanean egin ahal izateko espazio bat sortzeko asmoa duen mahaiaren sorrerak, mugimendu feministaren, herri-eragileen eta udalaren artean. Eraketa prozesu horretan beste arlo batzuk ere kontuan hartu direla adierazi du udalak: “Herriko elkarteek antolatzen dituzten ekimenetan emakumeen parte hartzea sustatu eta bermatzea, berdintasunarekin edota feminismoarekin lotutako gaien inguruan hausnarketa egin eta elkarlanerako adostasun-puntuak bilatzea, edota udalaren eta herritarren arteko zubiak eraiki eta berdintasun politikak herritarrei gerturatzea, besteak beste”.
Prozesua bitartean kontseiluaren araudia ere landu dute. Hori eginda, udalbatzarrera eramango dute funtzionamenduaren xehetasunak biltzen dituen agiria, bertan onar dadin. Onartzen bada, kontseilua martxan jarri eta berezko agente moduan funtzionatzen hasiko da. Behin martxan denean kontseiluaren egitekoen berri herritarren artean zabalduko dituzte, zer den eta zertarako sortu den sozializatuko dute. Hortaz ere hitz egingo dute asteleheneko bilkuran.
Orain arte Gaxuxa, Lezdi, Etxetxo, Allerru, Piztu Lezo, Ttakun eta Iruntzen Emakume Taldea elkarte eta taldeetako ordezkariak aritu dira bileretan. Egitasmo irekia denez, Lezoko Udaleko Berdintasun sailak bertan parte hartzeko gonbita egin die berdintasunaren alde lan egin nahi duten norbanako eta eragileei.
