San Juan baleontzia barrutik bisitatzeko aukera
Albaolak bisita gidatuak antolatu ditu ontziaren barrualdea bisitatzeko. Bisitak urriko igande goizetan izango dira.
Udan zehar Albaolak San Juan baleontziaren barrualdea bisitatzeko aukera eskaini du. Ordura arte, soilik lantaldeak eta ikusle gutxi batzuek bisita zezaketen ontziaren barrualdea. Orain, baina, publikoari ontziaren ateak ireki dizkio Albaolak, eta bisita gidatuak antolatu dituzte. Iniziatibaren arrakasta ikusita, Albaolak San Juanaren barrualdea bisitatzeko data berriak iragarri ditu. Bisita gidatu horiek urriaren 26ra arte izango dira, igande goizetan.
Bisita horiek baleontziaren barne bizitza gertutik eta modu didaktikoan ezagutzeko aukera emango dutela jakinarazi du Albaolak. San Juan Pasaiako portuan eraiki zen, eta Kanadako uretan hondoratu zen, 1565ean. Pasaian XVI. mendeko baleontziaren erreplika zehatza egiten ari dira, garaiko ezaugarri berberekin. Ibilbidean baleontziaren atal ezberdinen funtzioak, nabigazio baldintzak, tripulazioaren antolaketa eta garaiko itsas teknologien gakoak azalduko dituztela aurreratu du Albaolak.
Bisitak talde txikietan egingo dira, eta euskaraz, gaztelaniaz, ingelesez eta frantsesez eskainiko dira. Gutxi gorabehera 20 minutuko iraupena izango dute. Aurrez aipatu bezala, urriko igande goizetan izango dira bisitak: urriaren 5ean, 12an, 19an eta 26an. Sarrerak eskuragarri daude jada, Albaolaren webgunean.
Bisitan parte hartzeko gutxieneko adina 8 urtekoa dela gogorarazi du Albaolak. Segurtasun eta erosotasun arrazoiengatik, oinetako itxi eta erosoekin joatea gomendatu eta Albaolako taldearen jarraibideei uneoro kasu egitea eskatu dute. Azkenik, Albaolak garraio publikoa erabiltzea gomendatu die bisitariei, museoak ez baitu aparkalekurik.
