Bueltan da Pasaiako Zinema Txikia
Aurtengo ikasturteak zortzi emanaldi izango ditu, urriaren 4tik apirilaren 18ra bitartean. Proiekzioak Antxon, Donibanen eta Trintxerpen izango dira.
Joan den urteko emanaldi batean ateratako irudia da honakoa. Hemen da Pasaiako Zinema Txikiaren denboraldi berria. Egitasmoa 9 urtetik beherako haurrei begirakoa da, eta euskarako zinemaz gozatzeko aukera ematen die. Aurtengoan zortzi film egongo dira ikusgai, urriaren 4tik apirilaren 18ra bitartean. Proiekzio bakoitzak 90 minutu inguruko iraupena izango du, eta saioak Antxon, Donibanen eta Trintxerpen izango dira, den-denak 17:30ean. Ohi bezala, Donibaneko saioetara joateko motora zerbitzua eskainiko da. Motora 17:00etan irtengo da Trintxerpeko pantalanetik, eta San Pedron ere geldialdia egingo du, jendea hartzeko.
Emanaldietako sarrerak doakoak dira, baina Bibe plataforman erreserbatu beharko dira. Haurrak arduradun batekin joan beharko dira emanaldietara, baina haurrei begirako jarduera bat denez, haiek izango dute lehentasuna. Zinema Txikiaren lehen proiekzioa larunbat honetan izango da (urriak 4), Donibaneko Juanba Berasategi aretoan. Kiriku eta sorgina da lehen proposamena.
Zinema Txikiaren programazioa
- Urriak 4: Kiriku eta sorgina, Donibaneko Juanba Berasategi aretoan.
- Azaroak 1: Mamu harrapariak, Juanba Berasategi aretoan.
- Azaroak 29: Karmengo Ama ikastetxeko LH2 eta LH3ko ikasleek aukeratutako filma, Trintxerpeko alkateordetzan.
- Azaroak 29: Karmengo Ama ikastetxeko LH2 eta LH3ko ikasleek aukeratutako filma, Antxoko kultur etxean.
- Urtarrilak 17: Pasaia-Lezo Lizeoko LH2ko ikasleek aukeratutako filma, Juanba Berasategi aretoan.
- Otsailak 7: Nimona, Juanba Berasategi aretoan.
- Martxoak 14: Minecraft film bat, Juanba Berasategi aretoan.
- Apirilak 18: Kaixo, Frida!, Juanba Berasategi aretoan.
